Portavós Trababalladór Timoroan, Raimundu Inacio da Costa Pires de Rogiu hatete, prezensa traballadór ho KSTL iha asaun greve ne’e atu ezize sira nia direitu ba osan intensivu ka bunus ne’ebé  kompañia BRI halo diskriminasaun entre traballadór local ho traballadór indonezia.

Tanba nia dehan, durante ezistensia BRI iha TL iha tinan 2017, traballadór hirak ne’e hahú haknar-aan ona iha fatin refere no sira kontribui masimu ona masimu ba banku refere, maibé iha avaliasaun dezempeñu, sira la hetan osan intensivu ruma ka osan bonus husi Jerente Banku Rakyat Indonezia.

“Iha tinan 2020 ami hatene katak tinan-tinan ne'e iha bonus, ami husu ba parte Manajer BRI, tanba sá maka bonus ne’e ba imi deit, maibé ba ami Timoroan laiha, sira hatan katak ‘imi hakarak hetan bonus entaun ami aplika avaliasaun dezempeñu ba imi’, nune’e to’o iha tinan 2021, sira seidauk fó bonus, maske aplika ona avaliasaun dezempeñu ba ami no sira nafatin la fó bonus mai ami,”dehan nia ba Jornalista sira, iha Kantor Pusat BRI, Kolmera, Dili, Tersa (15/07/25).

Nia haktuir tan katak, ho diskriminasaun ne’ebé jerente BRI halo, traballadór hirak ne’e mós hato’o karta ba iha Parlamentu Nasional, SEFOPE, IGT no mós Banku Central Timor-leste atu bele buka solusaun ba iha problema ne’ebé traballadór sira hasoru, maibé nafatin laiha solusaun.

Ho nune’e, traballadór sira ne’e hatama fali karta ba KSTL, atu bele buka mós solusaun ba sira.

“Ami ezizi to'o ikus ha’u buka duni evidensia sira ne'e para atu koalia asuntu ne’e ba Parlamentu Nasional, maibé laiha solusaun, ba iha SEFOPE, IGT no mós ba iha Banku central maibé nafatin laiha solusaun,”

“Ami mós la’ós tur-tur de’it mak husu ami nia bonus, maibe ami servisu mate aan didiak iha Banku ne'e nia laran ho ami nia kosar been, ho buat hotu ne'e mak ami ezizi,”tenik nia.

Iha fatin hanesan, Prezidente KSTL Almeiro Vila-Nova hatete, ho ezizensia traballadór sira nian, KSTL halo ona aproximasaun ho manajer BRI, iha tinan kotuk, maibé to'o ikus kompañia ne'e nafatin la fó bonus ba traballador Timor oan sira.

Nune’e, maka KSTL hamutuk ho traballadór sira deside hodi halo asaun greve, hodi ezize traballadór sira nia direitu.

“Motivu husi asaun greve iha razaun rua ida maka bonus ne'ebé maka tinan 3 resin ona la hetan solusaun bonus bazeia dezempeñu, agora problema mak ne'e, husi home staf BRI  nian husi Indonesia hotu-hotu kada tinan hetan bonus, agora Timoroan sira durante ne'e servisu los, sira ninia responsabilidade ne'e bo'ot ebes, sira kontribui rendimentu bo'ot ba BRI, maibé bonus ne'e aplika deit ba staff Indonesia, ba Timoroan la aplika,”dehan Prezidente KSTL.

Entretantu, trabalhador Timoroan ne’ebé durante ne’e haknar-aan iha Banku Rakyat Indonezia hamutuk na’in 40, kompostu husi feto na’in 15 no mane na’in 25.