Primeiru Ministru (PM), Taur Matan Ruak hatete, liu husi enkontru Konsellu Ministru semana kotuk deside ona atu sosa medikamentu, maibé haree ba nasaun sira iha mundu kompañia sira lohi hanesan España, Italia, tanba ne’e deside kompañia ne’ebé maka atu fa’an aimoruk mai Timor-Leste tenke iha sertifikadu.

Rekijitus balun ne’ebé Timor-Leste hakarak maka medikamentu ne’ebé atu sosa tenke hetan rekoñesementu husi Organizasaun Saúde Mundial (OMS).

Atu sosa aimoruk ne’e, Governu deside liu husi UNDP atu identifika lolos kompañia ne’ebé legal iha sertifikadu lisensa.

“Ho nune’e ita prepara ona osan tokon $14 atu sosa aimoruk, liu husi UNDP atu iha serteja katak aimoruk ne’ebé atu sosa ne’e iha sertifikadu,”dehan nia, liu husi konferensia imprensa ohin.

Iha fatin hanesan, membru Sentru Integradu Jestaun Krize, Odete da Silva Viegas hatete, ekipa interministeriál ne’ebé oras ne’e servisu hamutuk hahú prepara ona ekipamentus, aimoruk no rekursu umanu, maibé presiza  asegura ba oin karik situasaun ne’e sai komplikadu.

Ba rekursu umanu oras ne’e ekipa kontinua halo hela treinamentu ba pesoal saúde sira atu okupa espasu sira la’os de’it iha Dili, maibé oinsá atu asegura fatin kuarentena, no fatin izolamentu iha munisipiu tomak.

Treinamentu ne’ebé hala’o ona ne’e fazeadamente ema na’in 150 to’o na’in 250, sei kobre to’o munisipiu 12 no RAEOA.

“Prosesu ekizasaun medikamentu ne’e asuntu emerjensia, governu sei esforsu aan oinsá atu servisu ho ajensia internasional atu nune’e bele hetan ekipamentu no medikamentu iha tempu determinadu,”nia informa.