Ministru Finansas, Rui Gomes, hateten, politika Oitavu Governu Konstitusionál mak kontinua halo aproximasaun ba Instituisaun Finanseira Internasionál sira atu hetan emprestimu konsesional ho objetivu atu finansia investimentu infraestutura ne’ebé fó impaktu ba kresimentu ekonomia iha rai-laran no garantia sustentabilidade Fundu Minarai.
“Emprestimu ho montante millaun $35 ne’e hanesan emprestimu ho funan kiik ho ninia periode maturidade tinan 15 no periode karensia tinan 5. Retornu investimentu Fundu Minarai iha fulan-Setembru tinan 2021 atinji 4,87% kada tinan, kompara ho kustu emprestimu konsesional, 2% kada tinan,”dehan nia iha komunikadu ne’ebé Online INDEPENDENTE asesu, segunda ne’e.
Nia hatutan, akordu empréstimu ida-ne’e mak dahuluk ba Eletrisidade Timor-Leste no hetan apoiu kontribuisaun finanseira husi Parseiru Dezenvolvimentu hanesan BDA, hafoin estabelese nu’udar Empreza Públiku. Akordu ida-ne’e mós hanesan apoiu BDA ba dahuluk iha setór enerjia iha Timor-Leste. Ida-ne’e hatudu sinál konfiansa ba malu husi parte rua ne’ebé envolve iha selebrasaun akordu ne’e.
Iha Sorumutuk loron 15 fulan-dezembru 2021, Konsellu Ministrus autoriza Ministru Finansas, Rui Gomes hodi reprezenta Estadu Timor-Leste asina akordu empréstimu millaun $35 ho Banku Dezenvolvimentu Aziátiku.
Governu Timor-Leste mós aloka millaun $15 liuhusi Fundu Infrastrutura hodi finansia reabilitasaun distribuisaun rede elétrika no konstrusaun edifisiu rejionál 12.
Projetu melloramentu distribuisaun enerjia eletrisidade ne’e, sei instala 140,000 smart meters no distribui kartaun pré-pagu atu ajuda uma-kain sira hodi jere sira nia uzu eletrisidade. Projetu ne’e sei instala sistema automatizasaun distribuisaun liña enerjia ida hodi mellora rede elétrika no instala mós transformadores distribuisaun hamutuk 30 hodi redus karga ne’ebé todan.
Iha eventu asinatura akordu ne’e, Ministru Rui Gomes akompaña husi Ministra Negósius Estranjeirus no Kooperasaun, Adaljiza Magno, Ministru Obras Públikas, Salvador Soares dos Reis Pires no mós Vise-Ministra Finansas, Sara Lobo Brites.
