Iha 4 Abril 2011, hafoin hala’o preparasaun durante fulan neen resin, ekipa Jornal INDEPENDENTE hahú ninia públikasaun dahuluk, ho notisia prinsipal ne’ebé foti mak kona-ba asuntu sosial.
Notisia prinsipal dahuluk ho titlu “Homan Mehi husi Lixu” reprezenta filozofia boot jornal INDEPENDENTE ne’ebé hatuur iha ninia motto ‘Imi-nia Lian, Imi-nia Liberdade”.
Hahú kedan inisiu, jornal INDEPENDENTE hakarak atu mosu ho obra jornalistiku ne’ebé diferente ho jornal sira seluk. Fó biban no espasu ba kbiit laek sira no hatutan lian husi sira ne’ebé lian laek.
Dalan naruk ne’ebé nakonu ho difikuldade, liu-liu ba kestaun finansiamentu no rekursu umanu, dala-balun besik atu ‘hamout’ jornal ne’e. Maibé ho komitementu husi ekipa inisiadór sira, jornal ne’e kontinua metin nafatin.
Durante ninia ezistensia, Jornal INDEPENDENTE koko atu hala’o misaun boot ida atu sai lian ba lian laek sira. Ikus mai, iha tinan 2020 no 2021, jornal INDEPENDENTE konsege hetan rekoñesimentu husi Konsellu Imprensa Timor-Leste no Centro Nasionál Chega (CNC) ba obra jornalistiku ne’ebé halai liu ba asuntu sosial.
Notisia ho titlu “Hisik Kosar ba Etu Bikan Ida” ne’ebé hakerek husi jornalista Mariano Mendonça konsege manan premiu husi Konsellu Imprensa no notisia ho titlu “Amika, Inan-nurak ne’ebé Hela iha Tia Nia Dapur” hakerek husi Januario Assunção konsege hetan premiu husi CNC.
Iha 18 Dezembru 2021, Jornal INDEPENDENTE selebra Natal Hamutuk no fó agradesimentu ba rekoñesimentu husi instituisaun sira ba obra jornalistiku ne’ebé jornal INDEPENDENTE públika no agradese mós ba ezistensia durante tinan 10.
Iha serimonia simples ne’ebé realiza iha edifisu jornal INDEPENDENTE ne’e hetan prezensa husi antigu jornalista no staf jornal INDEPENDENTE ne’ebé servisu hahú husi ninia ezistensia dahuluk to’o tinan 10.
Xefe Redasaun Jornal INDEPENDENTE, Jorgino dos Santos agradese ba ema hotu-hotu ne’ebé dezde inisiu to’o ohin loron fó sira-nia kontribuisaun ba ezistensia jornal INDEPENDENTE.
Nia dehan, susesu ne’ebé jornal INDEPENDENTE hetan to’o ohin loron nu’udar serbisu ekipa tomak nian ne’ebé kontinua hatudu sira-nia komitementu no dedikasaun ba interese públiku.
“Agradese ba ita hotu, ba fundadór sira, ba jornalista sira, ba estaf sira, antigu jornalista, ne’ebé fó ona kontribuisaun ba jornal ne’e hamriik to’o ohin loron. Susesu ne’ebé hetan nu’udar esforsu husi ekipa tomak,” dehan nia.
Iha fatin hanesan, Diretór jornal INDEPENDENTE, José Sarito Amaral, agradese ba antigu jornalista no estaf jornal INDEPENDENTE ne’ebé marka prezensa.
“Ami konsidera nafatin imi, tanba imi mak hahú no sira ne’ebé ohin loron servisu iha ne’e hatutan,” dehan nia.
Durante tinan 10 nia laran, Diretór ne’e dehan, jornal INDEPENDENTE hasoru problema oioin, hahú husi finansiamentu to’o rekursu umanu.
Maske nune’e, nia dehan, ho komitementu no esforsu ne’ebé ekipa halo ikus mai jornal ne’e kontinua eziste to’o ohin loron.
