TL Deve Ona Kuaze Millaun $615 husi ADB, Foin Selu 18% Featured

By Mariano Mendonça Outubru 11, 2023 4974
Osan dolar. Foto:Dok. Osan dolar. Foto:Dok.

DILI: Governu Timor-Leste hahú husi tinan 2012, halo ona imprestimu ka 'deve' Banku Dezenvolvimentu Aziatiku purvolta millaun $615. Husi montante ne’e, foin maka selu 18%.

Diretor Jerál Resource Management no Mobilizasaun Ministériu Finansas, Francisco da Silva informa, dezde 2012 to’o tinan ne’e governu TL deve ona kuaze millaun $615 husi ADB.

Francisco hatutan, dividas ne’ebé governu halo ne’e bazeia ba lei dividas públiku númeru 13/2011.

“Ita iha ona purvolta $615 milioens ne'ebé mak ita impresta husi ADB," informa nia hafoin partisipa iha Workshop ne'ebé organiza husi ADB iha salaun Suai Room Timor Plaza, Tersa (10/10).

Tuir nia, imprestimu sira ne'e ho nia karaterístika ida ne'ebé mak bele dehan ho kustu baratu tebes, pursentu boot liu mak 2% husi funan.

"Husi totál imprestimu ne'e oras ne'e daudaun ita selu fali ona 18% ba Banku Dezenvolvimentu Aziatiku," dehan nia.

Imprestimu husi ADB ne'e, nia esplika, maioria hodi finansia infra-estrutura hanesan projetu estrada, no ponte.

“Públiku bele haree estrada husi Dili ba to’o Ainaru no Dili ba Lospalos no Vikeke ne’ebá, no mós tama to'o Batu Gade ne’ebá, ne'e imprestimu husi ADB nian.”

Kona-ba workshop ne’ebé organiza husi ADB, Franciso dehan, workshop ne'e atu kapasita Timor-oan sira, liu-liu Ministériu Finansas, atu bele korresponde ba nesessidades, liu-liu haree ba iha imprestimu nian, tanba sei tarde iha levantamentu sira.

"Workshop ida ne'e oinsá atu kapasita ita-nia ema ka ita-nia rekursus rasik par bele korresponde bá ita-nia nesessidades, liu-liu ba iha osan imprestimu sira ne'ebé mak ita foti durante ne'e, sei tarde iha levantamentu."

"Formasaun ida ne'e ho modelu sira ne'ebé fornese liu husi treinamentu par oinsá bele korresponde ba ita-nia nesessidades levantamentu dezembolsu ne'e liu husi sistema online ona, direitamente ba sira-nia sistema rasik," nia dehan.

Rate this item
(0 votes)
Last modified on Sexta, 13 Outubru 2023 09:52

Independente Digital TV