TL-Brunei Darussalam Asina Akordu Free Visa ba Passaporte Diplomata No Servisu Nian Featured

By Ivonia Varela Maiu 21, 2024 211
Governu Timor-Leste ho Brunei Darussalam asina akordu kona-bá visa nian. (20/05/24). Foto:Media GPM. Governu Timor-Leste ho Brunei Darussalam asina akordu kona-bá visa nian. (20/05/24). Foto:Media GPM.

DILI: Governu Timor-Leste ho Brunei Darussalam asina akordu kona-bá visa on arrival, free visa ne’ebé vale bá pasaporte diplomata no pasaporte servisu nian, ne’ebé Konsellu Ministru aprova ona proposta atu asina akordu ho nasaun ASEAN sira bá esesaun vistu durante loron 30.

Asinatura akordu ne’e, Brunei Darussalam reprezenta hosi Vise-Ministru no Gabinete Primeiru Ministru, Dato Mohd Riza DP Haji Md Yunos no Timor-Leste reprezenta hosi Ministru Negósiu Estranjeiru no Kooperasaun, Bendito dos Santos Freitas.

Tuir komunikandu ne’ebé Online INDEPEDENTE asesu katak, asina akordu ne’e hanesan parte ida hosi kritériu mapa entrada nian no ida-ne'e mak atu negosia esesaun vistu bá diplomata, traballadór no turista sira.

Nasaun sira ASEAN nian maka Brunei Darussalam, Kamboja, Indonézia, Laos, Malázia, Myanmar, Filipina, Singapura, Tailándia no Vietnam. Timor-Leste mós antes asina ona ho Indonézia, Kamboja, Singapura no Malázia.

Akordu sira ne'e asina ona hosi kada Estadu- membru ASEAN nian no sei permite bá sidadaun Timor-Leste nian, nasaun hirak ne'e bainhira hala’o viazen bá territóriu Estadu signatáriu seluk, sei benefisia hosi livre vistu ho períudu másimu loron 30 bá fins turístiku.

Antes ne’e mós Prezidente Repúblika (PR), José Ramos-Horta konvida Liurai Bolkiah atu halao vizita Estadu mai Timor-Leste bainhira hala’o vizita Estadu bá Brunei Darussalam, iha 8 Novembru 2023.

Brunei Darussalam nu’udár nasaun ida iha Sudeste Aziátiku ne’ebé rekoñese indepedénsia Timor-Leste nian hafoin konkista ninia liberdade hosi Indonéiza iha tinan 2002 liu hosi luta ne’ebé difísil no naruk.

Delegasaun ne’e kompostu hosi Liurai Brunei Darussalam Sua Majestade Sultan Haji Hassanal Bolkiah, Vise-Ministru no Gabinete Primeiru Ministru, Dato Mohd Riza DP Haji Md Yunos, Ministru Administrasaun Interna, Dato Haji Ahmaddin Haji Abdul Rahman, Ministru Relasaun Exteriór II, Dato Erywan Pehin, Sekretáriu Permanente Adjuntu Ministériu Relasaun Esteriór, Yusof Hajah Mardiana Haji Omar, Ofisiál peskiza Ministériu Relasaun Esteriór, Nurul Syaffeenazz Abdul Tahir, Embaixadór Brunei Darussalam iha Timor-Leste, Wan Hadfi Lutfan Adbul Latif.

Rate this item
(0 votes)

Independente Digital TV