Ministru Klamar Fuik hatete, primeira-vez vizita Embaixador Brazil nian mai komprimenta no mos oinsá troka impresaun kona-ba intensifikasaun kooperasaun entre Timor-Leste no Brasil iha setór defeza no seguransa nian.

“Ami ko’alia ho ba malu kona-ba saida maka kooperasaun ne’e halo tiha ona, no ami mos buka atu halo hamutuk fila fali no bele lalais liu programa ida ne’ebe mak bolu akordu protukular ida ne’ebe maka sei hamahon akordu trabalhu ne’ebe mak hotu-hotu halo ona. Senor embaixador konkorda ona para ami atu halo hamutuk lalais, para depois bele asina,” dehan nia, iha Ministeriu Defeza, Fatuhada, horisehik.

Nia afirma, Brasil ho Timor-Leste iha relasaun bilateral di’ak dezde Timor-Leste nia independénsia. Brasil sempre apoiu dezenvolvimentu forsa armada nian iha área kapasitasaun rekursu umanu no formasaun ba militar timoroan sira.

Nia hatutan, Brazil mak país amigu importante ida ne'ebé estabelese Polísia Militár (PM) no kontinua dezenvolve unidade ida ne'e to'o fali agora.

Aleinde ne'e, Brazil mós haruka komandu importante sira ne'ebé daudaun ne'e apoia hela iha Autoridade Máritima Nasionál, tan ne'e mak enkontru ida ne'e importante atu bele hametin liu tan kooperasaun entre país rua.

“Ohin mos ami aborda atividade balu ne’ebe relasiona ho asesoria Brazil nian iha F-FDTL no iha ministeriu. Tanba ne’e, mak ami abranje asuntu tolu primeiru mak asesoria mai iha ministeriu defeza husi postu ida, muito elevadu, depois iha Autoridade Maritima Nasional sira Brazil haruka komandante mariña nian ida no mos asesoria ba iha ita-nia Polisia Militar,” dehan Klamar Fuik.

Iha fatin hanesan, Embaixador Brasil mai Timor-Leste, Ricardo José Lutosa Leal, entendimentu ne’e iha ona benefísiu Timór nian, hanesan asuntu ne’e. Hanesan ksolok ida atu bele kontempla orizonte ida kontinuidade nian ba kooperasaun ida-ne'e iha área defeza nian.

“Ha’u sei temi mós, badak tebes, kuadru formál ba entendimentu ida-ne’e, ne’ebé agora sei ezamina fila fali, no reuniaun tuirmai Xefe Estadu-Maiór Forsa Armada sira CPLP nian, ne’ebé tuir loloos sei akontese iha Brasília, no ha’u konsege rona hosi ministru katak Jeneral Paulo sei partisipa. Entaun, dala ida tan, ha’u agradese tebes ba okaziaun no razaun onra no orgullu Brazil nian tanba bele koopera ho Timor-Leste, nasaun luzófonu iha ASEAN, área estratéjiku ida ba Brazil, iha kampu ida ne’ebé relevante hanesan defeza. Di'ak tebes”, tenik nia.