Antes ne’e, ekipa MSSI hala’o ona avaliasaun ba servisus ne’ebé ISS sira halo no proposta ne’ebé sira submete ba ministériu liga ho sira nia programa no atividade inklui sira nia ezekusaun orsamentu.
Ho nune’e, bazeia ba avaliasaun, MSSI aprova hodi realiza asina akordu ho ISS, nune’e sira bele hetan apoiu orsamentu husi MSSI hodi finansia sira nia atividade.
Diretór Jerál Administrasaun Finansas MSSI, hanesan mós representa Ministra Solidariedade Sosiál no Inkluzaun, Rui Manuel Gago Exposto hateten, Governu fó apoiu orsamentu liu husi ISS ho objetivu atu tulun ema sira ne’ebé presiza fó apoiu.
Maibé husu mós ba instituisaun sira atu ezekuta orsamentu tuir regras sira ne’ebé existe ona, karik iha mudansa ruma husi proposta ne’ebé aprova ona, husu ba ISS atu informa ba MSSI antes ezekuta, atu nune’e ezekusaun orsamentu bele la’o di’ak nafatin.
“MSSI hakarak fó apresiasaun ba servisu ISS sira nian ne’ebé fó ona apoiu ba benefisiáriu sira hodi rezolve problema sosiál sira ne’ebé komunidade enfrenta,”dehan nia hafoin selebra akordu ho ISS, iha Edifisiu MSSI, Kaikoli, segunda (19/06).
Iha fatin hanesan, Diretór Jerál Solidariedade Sosiál no Inkluzaun, Florencio Pina Dias Gonzaga hateten, MSSI ho ISS hala’o asina akordu koperasaun atu bele implementa programa sira ne’ebé ligadu ho asuntu defisiénsia ninian, protesaun labarik vulneravél sira, atividade sentru komunitária no atendimentu ba vítima sira iha uma mahon.
Ba tinan 2023, alokasaun orsamentu ba ISS hamutuk dolar amerikanu tokon $1.4, maibé liu husi prosesu avaliasaun no diskusaun naruk ho instituisaun sira, konsege ezekuta tokon $1.3 resin no balansu sei iha dolar amerikanu rihun $500 resin.
"Alokasaun orsamentu ba Istituisaun hirak ne’e ninia total orsamentu sei la hanesan entre instituisaun ida ho instituisaun seluk, tanba depende ba sira ninia programa no atividades," dehan Diretor Jeral MSSI.
