Reitór Universidade Oriental Timor Lorosa’e, Claudino Ninas Nabais hatete, normál kada tinan universidade simu estudante kuaze rihun ida-resin, tanba haree ba infraestrutura no rekursu umanu.
“Tinan ne'e iha fulan janeiru liu ba, bainhira UNTL seidauk publika lista finál estudante sira ni’an, ita rejistu ona estudante kuaze 500-ital. Tanba ne'e agora ita kontinua halo rejistrasaun ba estudante sira ne'ebé la pasa iha UNTL,” Katak nia ba jornalista Média INDEPEDENTE, iha nia kna'ar fatin Bekora, Segunda (16/02).
Nia dehan, ho númeru ne'e hatudu progresu di'ak. tanba universidade ne'e hanesan universidade ida-ne'ebe propinas baratu liu kompara ho universidade privadu sira seluk.
Tuir nia, se estudante ne'ebé admitidu ba UNTL mak rihun atus lima. Entaun signifika restante sira-ne'e sei ba rejistu iha universidade seluk.
“Ha'u fiar sira-ne'ebe ekonomikamente fraku sira sei hili UNITAL ba fatin estudante. Tanba UNITAL nia propinas mais baratu liu. Maibé propinas balun ne'ebe ita asegura ba sustentabilidade ezisténsia universidade ni’an. Ita mantein se la’e universidade monu,” Reitór ne'e esplika.
Kona-ba estudante ne'ebé atu hili Fakuldade Saúde, nia informa, universidade iha regras ba estudante sira-ne'ebé atu asesu ba Fakuldade Saúde.
"Ita iha regras. primeiru ita nia angulu ba siénsia naturais mak bele asesu ba Fakuldade Saúde, liu-liu ba Departamentu Análiza Kimiku, Enfermazen no mós seluk tan," Nia informa.
Maibé, nia mós informa, karik fora husi Siénsia naturais, sei iha kursu adisionál durante fulan tolu. Depois mak sira bele ba hamutuk ho estudante sira seluk, nune'e sira iha konesimentu ba departamentu ne'ebe sira hili.
"Tanba iha Departamentu Enfermazen no análiza laboratóriu maioria analiza no kalkulu barak. Entaun ita presiza sira ne'ebe iha siénsia naturais," Nia tenik.
Kona-ba sala-de-aula, Reitór ne'e reforsa, kona-ba infraestrutura sufisiente ba estudante sira utiliza ba prosesu aprendizajen.
“Iha tinan kotuk ita finaliza ona konstrusaun ida. Tanba ne'e sala-de-aula sufisiente hela, maibé tuir ami nia planu estratéjiku tinan ne'e sei iha tan kontrusaun foun ida, para akumula estudante liu-liu area saude nian no sira seluk tan,” Reitór ne'e haktuir.
Aliende ne'e, universidade mos, sei konstrui sala-de-aula ne'ebé ho medida boot, atu bele aumenta frekuénsia ba prátika laboratóriu ni’an.
Entretantum UNITAL iha Fakuldade hitu henesan, Fakuldade Direitu, Fakuldafe Sensia Sosial Politika, Fakuldade Ekonómia, Fakuldade Agrikultura, Fakuldade Edukasaun, Fakuldade Siénsia Saúde, no Fakuldade Enjeñaria.
Editor: Aquino Gomes
