MEJD, Armindo Maia hateten, objetivu husi audiénsia públiku ho Komisaun G Parlamentu Nasional atu halo diskusaun ba Orsamantu Jerál Estadu 2023 no aprezenta ezekusaun Orsamentu 2022 nian.
"Orsamantu ba tinan fiscal 2023, MEJD propoin millaun $ 122 ne'ebé sei fahe ba edukasaun formasaun, jestaun instituisionál no edukasaun inkluziva," dehan Armindo Maia ba Jornál Independete iha Parlamentu Nasionál, Segunda (10/10).
Nia haktuir, orsamantu hirak ne'e atu rezolve mós profesór kontratadu sira ne’ebé mai iha ukun governasaun anteriór kuaze 5 mill, inklui rezolve problema profesór voluntariu kuaze 6 mill.
"Preokupasaun ne'e pertinente tebes no daudaun ne'e halo verifikasaun katak, profesór sira ne'ebé rezigna no sira ne'ebé mak tama idade reforma, sira ne'ebé mak maromak bolu ona, inklui ba sira ne'ebé sai ona ba fatin seluk," tenik nia.
Aliende ida ne'e, MEJD mós esplika prosesu ezekusaun Orsamentu Jerál Estadu 2022 nian ba Komisaun G.
"Primeiru prosesu ba profesór kontratadu no voluntarius ne'ebé mak agora iha hein iha faze finál, segundu Infraestrutura, projetus komunitarius ho kapitál Dezenvolvimentu ne'ebé mak lao neneik, maibé ninia progressu ne'e pozitivu," Nia relata.
Nia reforsa, terseiru mak fó formasaun portugues ba profesóres ne'ebé mak MEJD tarjetu rihun 4 profesores.
Prezidente Komisaun G, António Verdial de Sousa husu MEJD kondena komisaun funsaun públika atu bele rezolve tiha profesor kontratadu iha territóriu nasionál.
"Meza mós husu ba Ministériu Edukasaun atu nune'e bele rezolve tiha Projetu komunitarius edukativa ne'ebé mak agora dadaun la'o iha territóriu nasionál hein katak sira bele tau konsiderasaun hodi rezolve iha tempu badak," dehan nia.
Purtantu Orsamentu Jerál Estadu tinan fiskál 2023 montante Millaun 122,249,822. Husi montante ne'e sei ba fahe ba Boa Governasaun no Jestaun Instituisionál $ 12,957,820. Edukasaun no Formasaun $108,398,173, Igualidade Jéneru no Inkluzaun Sosiál $ 893,829.
