Nia hatutan, iha tinan 2009, governu Tmor-Leste deside  servisu hamutuk ho governu Korea, hodi haruka timor-oan ba servisu iha Korea Súl hamutuk na’in 94.

“Entaun ba tinan tuir mai, iha tinan 2010 komesa timoroan barak ona hamutuk na’in 340 mak ba servisu iha ne’ebá. Tuir mai iha tinan 2011, iha na’in 185, iha tinan 2012 na’in 286, iha tinan 2013 na’in 280, iha tinan 2014 na’in 246 no  iha tinan 2015 iha na’in 417,” dehan nia iha salaun Ótel Timor-Lodge, Komoro, kuarta (25/05).

Aleinde, iha tinan 2016 iha na’in 504, tinan 2017 hamutuk na’in 284,  iha tinan 2018 na’in 320, tinan 2019 iha na’in 515.

“Iha tinan 2020, ita hasoru moras Covid-19 ne'ebé timor-oan ba oituan deit, iha na’in 25, depois iha tinan 2021 sa’e fali ba 232 no tinan ida ne’e (2022), hahú husi janeiru to’o marsu timor-oan hamutuk 529 mak ba tan servisu iha Korea Súl,”tenik nia.

Nia haktuir, husi númeru ne’e sira ne’eb’e ba servisu iha area peskas iha na’in 2.659 no iha area fabrika hamutuk na’in 1.607 kompostu husi feto na’in 65 no restu mane hotu.

Aleinde, iha area agrikultor, iha feto na’in 73 no mane na’in 53.

Nia akresenta, husi númeru traballadór na’in 4.457 ne’e, balun kontinua halo ona negosiu kiik-oan sira iha Timor-Leste.

Entretantu, traballadór sira ne’ebé ba servisu iha Korea Súl, kontribui ona reseitas hamutuk dolar amerikanu U$43,047,509,15 ba kofre estadu.