Diretora Jeral Prestasaun Saude Odete Viegas da Silva hatete, ema sira ne'ebé MS liberta nu'udar Timor-oan husi rai li'ur ne'ebé tama dahuluk iha kuarentena hafoin governu estabelese.
“Pasajeiru sira ne'ebé kompleta ona loron 14 ne’e hamutuk 164, kompostu husi hotel Novo Horizonte hamutuk 98 no husi hotel Audian hamutuk 66 mak fo livre ona ba sira bele fila ba sira-nia familia ona,” dehan Odete iha Hotel Novo Horizonte Metiaut, Segunda (06/04).
Nia dehan, husi total 164 ne’e feto na’in 68 no mane 96, no iha na'in 41 mak sei dezloka ba munisipiu.
Nia husu mós ba sira ne'ebé livre ona atu kumpre nafatin medidas preventivas hanesan fase liman bebeik no mantein distansia sosial.
"Kuandu iha sintomas ruma isin-manas, mear, kakorok moras kontaktu kedas servisu vizilansia epidemolojia atu bele fó asistensia no hasai amostra," nia husu.
Iha fatin hanesan, Prezidente CNRT Kay Rala Xanana Gusmão deklara sente kontente akompaña familia simu sira-nia ona ne'ebé kumpre ona periodu kuarentena.
“Ha'u kontente, tanba imi durante loron 14 hela iha otel Novu Horizonte ho Audian laiha moras sintomas covid-19, tanba ne’e ha'u husu imi fila ba hamutuk ho família imi tenke fo ezemplu di'ak ba família ho sosiadade no labele halo festa,” dehan Xanana.
Tuir Xanana, Timor-oan ne’ebé foin fila husi nasaun afetadu obrigatoriu tama iha kuarentina durante loron 14 hafoin bele ba hamutuk ho família no sosiadade.
“Durante loron 14 imi laiha moras, tanba ne’e imi ida-idak sei fila ba imi-nia uma, maibé parte ida imi tenke ajuda governu liu husi informasaun ba familia no sosiadade hodi konbate lisuk moras corona virus deasses 2019 labele akontese iha Timor Leste,” dehan nia.
Xanana hatete, atu moras ne’e labele daet barak liu tan iha TL Timor-oan tenke hadomi malu, hatudu hahalok di'ak ba familia no sosidade hafoin mak hanoin ba nasaun.
“Imi fila ba hamutuk ho imi-nia familia imi tenke hanoin hadomi uluk familia, depois imi-nia viziñu no ita-nia nasaun Timor Leste hodi eduka malu nafatin luta hasoru Covid-19,” nia husu.
