Diretor Ezekutivu TIC-TL Roberto Caitano de Sousa Vicente hatete, asina nota entendimentu ne’e hodi servisu hamutuk iha área informátika.
“Nota entendimentu ne'ebé ohin asina sei kobre apoiu báziku sira nian hanesan, dezenvolvimentu portal website, hosting no servisu email sira hodi fasilita servisu KNTLU iha sistema informasaun," dehan nia salaun Prezidensia Konsellu Ministru, Palasiu Governu, kuarta ohin (19/05).
Diretór Ezekutivu ne’e hatutan, TIC TIMOR I.P, oras ne'e dadauk apoiu ona instituisaun estadu 40 resin iha servisu informátika nian no KNTLU mós hola parte hanesan parseiru TIC TIMOR nian iha area teknolojia.
Iha fatin hanesan Sekretariu Ezekutivu KNTLU, Francisco Barreto hatete, kooperasaun ida ne’e ho TIC Timor, hanesan amizade ida ne’ebé diak tebes no sai mós hanesan mahon ba teknolojia ba informaun no komunikasaun iha Timor-Leste ne’ebé fornese apoiu ba instituisaun publiku sira ne’ebé tutela hanesan iha Komisaun Nasiónal Timor-Leste ba UNESCO.
KNTLU konfesa iha atividade barak seidauk to’o ba iha komunidade no publiku sira, tanba ne’e mak liu husi nota entendementu ne’e atu estabelese website ofisial atu fornese informasaun ne’ebé positivu no kredibilidade ba komunidade bele hatene informasaun no programa ne’ebé eziste iha TIC-TL.
Nota entendimentu ne'e, asina husi Diretor Ezekutivu TIC TIMOR IP, Roberto
Caitano de Sousa Vicente ho Sekretáriu Ezekutivu KNTLU Francisco Barreto, iha sala auditoria PCM, Palasiu Governu iha loron 19 fulan-Maiu.
Iha biban ne'e mós asina Service Level Agreement (SLA) ba website nian, ne'ebé asina husi Diretor Divizaun Aplikasaun, Justo Fernandes ho Koordenador Komunikasaun no Informasaun KNTLU Clementino Pinto Amaral no SLA ba Email Ofisial asina husi Diretor Divizaun Infraestrutura, André Felix Marques ho Koordenador Komunikasaun no Informasaun KNTLU Clementino Pinto Amaral.
Bazeia ba dekretu lei númeru 29/ 2017, Ajensia TIC TIMOR I.P harii ho nia papel atu implementa politika liga ba Teknolojia Informasaun no Komunikasaun (TIK) hodi prepara teknolojia ne'ebé ótimu inklui aplikasaun, infraestrutura nomós politika informátika bazea prioridade nasionál.
Tanba ne’e, VIII Governu konstitusionál tau prioridade importante ba asuntu Governu-Eletróniku, nune'e TIC TIMOR kontinua servisu ho instituisaun estadu sira atu fó apoiu iha dominu Governu eletróniku tuir sira nian nesesidade no haree ba padraun sistema informatika Governu nian.
Asistente Editor: Saturnina da Costa
