Maske rekoñese katak salariu ne’e boot, maibé Xefe Governu ne’e kontinua ‘defende’ an katak implementasaun salariu ba dirijente Institutu Públiku (IP) no Empreza Públiku (EP) bazeia ba lei sira ne’ebé aprova iha governasaun hirak liu ba kotuk.
PM Taur dehan, salariu boot ba dirijente IP no EP ne’e laos buat foun tanba mai kedan husi governu hirak liu ba.
“Saláriu boot ne'e buat ida ne'ebé mai husi kotuk kedas mak to'o ohin loron, ne'e lá'os buat foun ida ba públiku,” dehan PM Taur hafoin hasoru-malu ho Prezidente Repúblika, José Ramos Horta, iha palasiu prezidensial Bairo-pite, Kinta (06/10).
Maske nune’e, Xefe governu ne’e hatete, presiza hadi’a duni salariu dirijente IP-EP atu labele boot liu salariu Prezidente Repúblika.
"Agora se imi husu ita iha hanoin, polítika, atu aban-bainrua hadia, ha'u hanoin tenke hadia. Purezemplu, Xefe Estadu iha ne'e la husik ema ida manan (salariu) liu nia (PR), ne'e mós mensajen ida," dehan Taur.
Molok ne’e, Ministru Asuntus Parlamentares no Komunikasaun Sosiál (MAPKomS), Francisco Martins da Costa Pereira Jerónimo hatete, Konsellu Ministru halo ona diskusaun kona-ba saláriu ba Institutu Públiku (IP) no Empreza Públiku (EP).
"Atu aprova dekretu lei ida atu regulariza sira, atu sira (nia salaraiu) labele aas liu Prezidente Repúblika nian," dehan Ministru Jeronimo ba deputadu sira iha plenaria Parlamentu Nasionál, Tersa (27/09).
Ba kestaun ne’e, Ministru Prezidensiá Konsellu Ministru (MPKM) Fidelis Manuel Leite Magalhaes hatete, governu diskuti hela salariu ba IP no EP.
“Agora bu'at ne'ebé mak oitavo governu konstitusionál koko atu halo ne'e mak dekretu lei ida par tau level ida hanesan par ke IP no EP sira ne'e iha referensia ida ke hanesan, ne'e mak iha semana kotuk diskusaun maibé seidauk to'o ba aprova tanba tenke halo tan reuniaun tekniku sira,” dehan nia hafoin reuniaun KM, iha palasiu governu, Kuarta (28/09).
Nia hatutan, diskusaun ba salariu IP no EP ne’e sei kontinua no KM sei halo diskusaun naruk no parte tekniku nian sei halo tan ajustamentu sira no verifikasaun legal no teknika par iha desizaun ida ne'ebé mak di'ak ba parte poupansa nian no evita ema halai ba-mai husi kargu sira ne'ebé sira okupa.
Fidelis dehan tan, revizaun ne’ebé halo sei iha implikasaun ba ema-nia salariu ka rendimentu, tan ne’e buat ne'ebé governu koko atu halo mak tenke justu katak tenke sura hotu preokupasaun sira, halo diskusaun ho klean no hakarak mós mekanizmu ida ne'ebé mak di'ak hodi bele define fiksa remunerasaun ho forma ne'ebé mak loloos, klaru ho justu ba ema hotu.
"La'ós ita halo hanesan halo de'it laiha efeitu ne'ebé di'ak ba evolusaun, tanba ida ne'e mak governu sei deskute nafatin asuntu ne'e, parte tekniku sira husi Konsellu Ministru nian kontinua halo diskusaun ho Ministeriu relevante sira hodi deskute kona-ba asuntu ida ne'e," dehan nia.
Entretantu, iha fulan kotuk mosu tabela renumeratoriu ba dirijente EP no IP espaila iha média soaial. Tabela ne’e kompleta kedan ho dekretu lei ne’ebé sai baze legal ba sira hodi simu salariu boot, hanesan: (1) Diretór Ezekutivu Ajénsia Nasionál Dezenvolvimentu (ADN) simu salariu $4.500 kada fulan bazeia ba dekretu-lei nú. 14/2022, 19 de Janeiru; (2) Prezidente Institutu Nasionál Kombate HIV-SIDA, Institutu Públiku (INCSIDA,I.P) ho salariu $3.300 bazeia ba dekretu-leu nú.15/2022, 22 de Fevereiru; (3) Diretór Ezekutivu Autoridade Nasionál Água no Saneamentu, Institutu Públiku (ANAS-IP) ho salariu $5.000 bazeia ba dekretu-lei nú. 7/2021, 10 de Marsu; (4) Diretór Ezekutivu do Fundu Espesiál Dezenvolvimentu de Ataúro ho salariu $4.000 bazeia ba dekretu lei nú. 21/2022, 13 de Jullu; (5) Prezidente Bee Timor-Leste, Empreza Públiku (BTL,EP) ho salariu $6.000 no Vogais BTL,EP ho salariu $5.000, bazeia ba dekretu lei nú.8/2021, 10 de Marsu; (6) Diretór Ezekutivu Autoridade Nasionál Eletrisidade, Instituto Públiku (ANE,IP) ho salariu $5.000, bazeia ba dekretu lei nú.9/2021, 10 de Marsu; (7) Prezidente Eletrisidade de Timor-Leste, Empreza Públika (EDTL,EP) ho salariu $6.500 no Vogais EDTL,EP ho salariu $6.000, bazeia ba dekretu lei nú.10/2021, 10 de Marsu; (8) Prezidente Insititu Nasionál Seguransa Sosiál (INSS) ho salariu $4.000 bazeia ba dekretu lei nú.2/2019, 18 de Janeiru; no (9) Diretór Ezekutivu Sentru Nasionál Chega, Instituisaun Públika (CNC,IP) ho salariu $6.000 bazeia ba dekretu lei nú.15/2017, 12 de Abríl.
Enkuantu, tuir Lei númeru 14/2019, 21 de Outubru, Kapítulu II (Prezidente Repúblika) iha artigu 4, kona-bá Remunerasaun Prezidente Repúblika nian iha númeru 2 hatete, Prezidente Repúblika simu saláriu mensal $2.500, no iha númeru 3 fó direitu ba Prezidente Repúblika kona-bá direitu abono ba despeza ka allowance ho nia valór 100% husi nia saláriu báziku ($2.500) ho nune’e, totál kada fulan Prezidente Repúblika simu $5.000.
