Deklarasaun ida ne’e mai husi Membru Asembleia Konstituante, Alexandre Corte-Real ‘Nau-pai Beram’, tanba konsidera sura fulan de’it deputadu lejislatura dalima remata ona sira-nia mandatu.

"La nesesáriu atu sosá karreta ba deputadu sira, tanba sira atu utiliza ba kampaña eleitorál. Laiha jusitifikasaun atu halo prestasaun ba estadu kona-ba sosa karreta foun ba deputadu sira tanba hela tempu badak ona ne'e," dehan Alexandre iha Parlamentu Nasionál, Kinta (06/10).

Tuir nia, se deputadu sira hanoin katak sosa karreta ne’e atu fasilita no kumpre de'it regras hodi gasta de'it Orsamentu Jerál Estadu ba tempu badak, di’ak liu lalika gasta osan.

Di’ak liu, Alexandre hatutan, osan ba sosa karreta ne’e di’ak liu uza ba povu nia nesesidade emerjensia sira.

Nia dehan, uluk iha konstituante dahuluk no lejizlatura dahuluk, estadu la sosa karreta ba sira maibé sira konsege halo buat barak ba nasaun.

"Ami halo buat barak, lei sira ne'e ami estabelese hotu, maibé estadu la sosá karreta hodi fó mai ami, ami la sa’e karreta foun, maibé ami halo servisu barak," katak nia.

Nia dehan, deputadu sira ohin loron la’o tuir de’it dalan ne'ebé mak uluk konstituente dahuluk estabelese ona, hanesan konstituisaun, lei sira no instituisaun sira.

“Agora sira mai ne'e hadia no aumenta de'it maibé ha’u haree sira utiliza oportunidade ne'e atu hetan fasilidade barak liu ona, karreta sosá dala hira ona, iha mandatu lejizlatura daruak to'o lejizlatura agora nafatin sosa karreta."

Ba lejizlatura dalima, nia hatete, sira-nia servisu durante ne’e la efetivu, liu-liu durente Covid-19 sira-nia deslokasaun ba terrenu ladun.

“Agora hela fulan 10 ba eleisaun, hola karreta atu halo saida? Osan ne'e ita hanesan so'e de'it," dehan eis deputadu ne’e.

Molok ne’e, Deputadu sira iha Parlamentu Nasionál aprova orsamentu millaun $1 resin ne’ebé aloka ba sosa karreta foun 30 ba deputadu sira. Desizaun ne’e foti liu husi diskusaun no aprovasaun ba proposta orsamentu privativu Parlamentu Nasionál nian ba tinan fiskal 2023.

Husi total orsamentu millaun $1.950 ne’ebé aloka ba sosa karreta foun ne’e, kada karreta sei sosa ho folin rihun $65.

Proposta sosa karreta ne’e hetan aprovasaun ho votus a favor 45, kontra ida no abstensaun 11.

Vise Prezidente bankada Fretilin, Antoninho Bianco husu atu lejislatura dalima di’ak liu foku ba objetivu saida mak atu halo no intrega sosa karreta foun ba lejislatura tuir mai.

"Agora ita sosa tan karreta, ha'u hanoin proposta ne'e elimina tiha, husik aban-bainrua Sexta Lejislatura mesak halo, ne'ebé Kinta Lejislatura ko'alia saida mak ita atu halo," dehan nia molok aprova orsamentu privativu PN, Segunda (03/10).

Vise Prezidente Bankada PLP, Francisco de Vasconcelhos preokupa ho folin karreta ne’ebé sa’e ona ba rihun $65.

Francisco dehan, PN bele kompleta karreta 30 nune’e deputadu na’in 65 bele sa’e karreta foun maibé tenke haree ba nia presu ne’ebé razoavel.

“Kompleta bele maibé nia presu ne'e razoavel ka lae? Presu ida uluk $40 mill depois agora $65 mill," dehan nia.

Tan ne’e, tuir nia atu labele hatodan liu pezu orsamentu PN nian, di’ak liu hasai tiha osan ba sosa karreta foun, husik aban-bairua deputadu foun mai mak haree fali nia orsamentu.

Prezidente Bankada CNRT, Duarte Nunes hatete, desizaun sosa karreta foun ba deputadu ne’e seidauk final, katak bele mosu proposta alterasaun iha diskusaun no aprovasaun Orsamentu Jeral Estadu 2023.

Maske nune’e, Duarte labele fó garante katak bankada ne’ebé nia lidera sei aprezenta proposta ida hodi hasai proposta sosa karreta foun ba deputadu sira.

"Sei iha desizaun ikus maibé ami sei konsulta malu tanba depende mós maioria ho minoria sei mosu iha PN tuir mai hola desizaun kona-ba situasaun ne'e," dehan nia.