Prezidente Federasaun Futeból Timor-Leste, Nilton Telmo Gusmão, dadaun ne'e seidauk iha empreza manan na'in ruma atu halo konstrusaun ba estadiu referidu.
“Fulan ida ka rua ba oin, ita sei organiza dokumentu atu hahu loke konkursu, nune'e ita nia kontraktor nasionál sira ne'ebe iha fundus bele partisipa, atu bele exekuta projeitu ida ne'e iha tempu besik," Katak nia ba jornalista sira, iha estadiu munisípal Dili, Sabadu (28/02)
Dadaun ne'e, nia dehan ba oin federasaun sei hapara atividade hotu iha estádiu munisipal Dili, atu foku ba nia kontrusaun.
"Ita sei hapara atividade hotu iha estádiu munisipal Dili, atu ita foku ba nia kontrusaun. Tanba ida ne'e parte ida husi infraestrutura ne'ebe federasaun hanoin atu halo, ho objetivu mak atu iha estádiu ho kapasidade ne'ebe boot,” Katak nia.
Prezidente Nilton subliña, objetivu husi konstrusaun ne’e mak, atu bele iha kondisaun ne'ebe di'ak ba futeból Timor-Leste.
Ligadu ho durasaun kontrusaun, Nilton Gusmão afirma, nia parte parte la iha detail kona-ba ida ne'e, maibe bele konklui iha fulan ualu ka sia nia laran.
“Ita hakarak konstrusaun lai ho lais, tuir kalendáriu FIFA nian,” Tenik nia.
Aliende FFTL mos aloka ona orsamentu atu konstrui estádiu minimu iha munisípiu Likisa no mos Aileu.
“Munisipiu rua ne’e mak ita sei hahu nia konstrusaun iha tinan ne'e, no mos sei iha kampu futsál ba munisípiu tolu hanesan Lautem, Viqueque no Ainaru, no ba tinan oin ita sei haree se konvensional FIFA ho AFC apoiu tan ita sei kontinua nafatin konstrusaun kampu sira," Nilton afirma.
Entretantu kondisaun atual iha estádiu munisipal Dili, kompostu sala-de-aula haat, rua ba fatin ekipa jogadór sira, saneamentu, hariis-fatin rua ba feto no mane, loket room, fatin parajen ba ekipa, tribun ba VIP, bisnis no ekonomia ho totál kapasidade akumula adeptu rihun-3.
Maibe, tuir Kritéria ne'ebé fó sai husi FIFA, membru nasaun neʼebé sai uma-na'in ba jogu internasionál presiza priénxe rekizitu sira hanesan estádiu tuir kategoria kompetisaun, Kopa Mundiál presiza kapasidade estádiu rihun 80, Kopa Rejionál rihun 60, jogu entre nasaun nivel A rihun 40, nivel B no C rihun 20 no mínimu estádiu hodi akumula adeptu rihun 5.
Aleinde ne'e, iha mós fasilidade primeiru sokuru, aula kontrola CCTV, odamatan ne'ebé tuir padraun prevene inundasaun, lampu eletrisidade mínimu 2.400 lux no obrigasaun iha genset, destaka seguransa no akomodasaun komplementár sira seluk hanesan fatin ba ekipa jogadór sira, media center, fatin ba ofisiál jogu, médiku no koloka fatin espesiál ba VVIP.
Estádiu tenke inkluzivu katak iha espasu ba Ema ho Defisiente (EhD) atu asesu no medida kampu tuir padraun, distánsia entre kampu ho bander metru lima (5) no tipu duut hanesan naturál, ibrida no sintestis tuir padraun FIFA.
Enkuantu, tuir rezultadu inspesaun ekipa konjunta rekomenda ba FFTL katak iha futuru Estádiu Munisipál Dili presiza aumenta fasilidade, lampu ba kampu, media center, roker room ba abritrajen, aumentu kadeira hodi hasa'e kapasidade estádiu, sistema drenajen, aumenta saneamentu, hadi'a duut no control room.
