Iha 13 Novembru 2019, hafoin polemika ne’ebé mosu relasiona ho kompetensia atu nomeia no fó pose ba Prezidente Autoridade RAEOA, Primeiru Ministru Taur Matan Ruak fó duni pose ba LUGU nu’udar Prezidente Autoridade RAEOA foun.
Loron hirak molok pose ba LUGU, Alkatiri ne’ebé tenke husik nia pasta nu’udar Prezidente Autoridade RAEOA deklara ba públiku katak, LUGU nia “prezensa” iha Oekusse sei dura ba tinan ida de’it.
“Ha’u la komenta ba ida ne’e. Imi hein de’it mak rona rezultadu. Tinan ida de’it. Tinan ida de’it. Hein tinan ida,” deklara Alkatiri iha intervista ho jornalista sira iha 7 Novembru 2019.
Iha altura ne’ebá, ho forsa politika ne’ebé Aliansa Maioria Parlamentar (AMP) ne’ebé forma husi CNRT, PLP no KHUNTO, iha, ema barak mak duvida no balun “hamnasa” ba predisaun husi Alkatiri ne’e.
Maibé, hafoin mosu mudansa boot ba politika, “predisaun” Alkatiri bele sai realidade. AMP sei eziste, maibé iha ona mudansa kompozisaun partidu politiku ne’ebé fó apoiu. CNRT sai ona no FRETILIN tama hodi troka ninia fatin.
Haree ba forsa politika ne’ebé iha, Bankada FRETILIN iha PN ‘la duvida’ hodi husu ba governu ne’ebé lidera husi Primeiru Ministru Taur Matan Ruak atu ‘tebe sai’ J.Luis ne’ebé seidauk kompleta fulan 7 ukun RAEOA.
“Hakarak rekomenda ba governu, se karik Prezidente Aautoridade RAEOA no ZEESM atuál mak inkapasidade, mak rekomenda ba Konsellu Ministru par foti desizaun hodi nomeia fali prezidente foun par kaer fali RAEOA no ZEESM, ne'ebé ho konsensu nasionál iha Parlamentu Nasionál ida ne'e,”dehan deputadu bankada FRETILIN Fabião Oliveira iha plenaria Parlamentu Nasionál, Segunda (01/06).
Tuir nian, presiza nomeia Prezidente Autoridade RAEOA foun, tanba atuál Prezidente Autoridade la hatudu pertensia hanesan lideransa RAEOA no ZEESM.
“Prezidente Autoridade RAEOA, José Luis Guterres simu tiha pose husi Primeiru Ministru (PM) nu'udar Prezidente Autoriedade RAEOA nian, la hatudu sentidu pertensia hanesan lideransa ida iha RAEOA, tanba saida? Tanba povu Atoni-Oekusse oan kestiona, tanba fulan hitu ona, la halo kontinuasaun ba programa sira iha RAEOA ne'ebé Prezidente Autoridade sesante Mari Alkatiri rai hela,” dehan Fabião.
Nia dehan, atual Prezidente Autoridade RAEOA hanesan Prezidente serimoniál, tanba so ba halo inaugurasaun ba projetu sira ne'ebé NGO sira hala'o ona, laiha planu ida feitu hodi kontinua projetu iha RAEOA no ZEESM.
Durante ninia mandate, Fabião dehan, LUGU so halo de’it kritika ba serbisu sira ne'ebé eis Prezidente Autoridade RAEOA husik hela.
“Prezidente Autoridade Lugu somente ba kestiona de'it mão-de-obra ne'ebé Marí Alkatiri iha momentu ne'ebá halo, entaun ida ne'e ha'u hanoin laiha planu kontinuidade ba estadu ida ne'e iha futuru,” dehan nia.
