Prezidente PN, Aniceto Longuinhos Guterres, simu karta destituisaun ne’e husi deputadu bloku AMP nian no haruka tutan ba tribunál hodi halo apresiasaun, maibé karta ne’e rasik tribunál la simu.

Tuir Juis Administradór TDD, Duarte Tilman hatete, tuir lei, tribunál tenke deside iha loron 10 nia laran, tanba prosesu urjente. Nune’e, juis prosesu halo ona despaxu ne’ebé kontein katak, indefere tanba laiha fundamentu.

Nia dehan, kompeténsia Parlamentu nian maka deside iha ne'ebá, la presiza to’o mai iha Tribunál Distritál primeira instánsia.

“Se kestiona kona-ba inkonstitusionalidade ruma, tenke ba iha Tribunál Rekursu, no agora tama sala fali iha tribunál distritál. Despaxu husi juis prosesu dehan katak indefere ka la simu, tanba prosedimentu la tuir nia dalan,”dehan Juis Administradór, Duarte, semana kotuk.

Tanba ne’e, tuir informasaun husi juis prosesu katak, Parlamentu Nasionál liu husi Prezidente PN aprezenta providénsia kautelar ida la ho naran indominada, no providénsia kautelar rua nia forma ne’e ida ho naran, ida la ho naran, ida ne’e mai la ho naran.

Tribunál la'ós rezolve kona-ba polítika, ne’e polítika sira maka hatene. Iha tribunál rezolve kona-ba kestaun téknika jurídika no fundamentu ne’e sei lee didi'ak iha despaxu ne’e maka bele hatene.

Konkluzaun indefere tanba, laiha fundamentu legál no informasaun notifika ona parte sira, liuliu prezidente parlamentu liu husi nia mandatoriu sira.