Diretora Ezekutiva Média One, Suzana Cardoso, hetan fiar husi na'in ba Média liu husi votasaun ne'ebé hala'o iha loron 11 fulan-Dezembro tinan 2024 ho votus 10.

Iha votasaun ne'e, Suzana Cardoso kompete ho kandidatura na'in rua hanesan José Sarito Amaral nudar na'in ba Média Jornal INDEPENDENTE atual Diretor Ezekutivu Jornal INDEPEDENTE no Otelio Ote nu’udar Prezidente Konsellu Imprensa atual.

Hafoin remata votasaun, Konselleiru KI eleitu,  Suzana Cardoso hato'o agradese bá média na'in sira ne'ebé hili ona nia hodi reprezenta Orgaun Komunikasaun Sosial ba  Konsellu Imprensa Timor-Leste iha periodu tuir mai.

"Obrigadu barak ba ita boot sira nia apoiu, no obrigadu barak ba ita boot sira nia vota, eleitu ida ne'e la’os ha’u nia susesu maibé mós ita nia servisu no ita nia responsabilidade tomak ita hotu hamutuk mak bele realiza ita nia misaun iha futuru bá ita nia média ne'ebé la'o ho di'ak tuir tuir ita nia mandatu iha orgaun Komunikasaun Sosial iha rai doben Timor-Leste," dehan Suzana iha  salaun Golden Star Audian, Kuarta (11/12).

Iha fatin hanesan, Prezidente Konsellu Imprensa, Otelio Ote hatete, momntu istoriku tebes ba konsellu imprensa iha konferensia eleisaun hili membru orgaun komunikasaun sosial periodu 2025-2029.

Nia informa, tempu hanesan ne’e konferensia ne’e importante tanba la’ós ko’alia de’it kona ba kualidade jornalista, kona ba sustentabilidade produsaun  maibé Konsellu Imprensa eziste atu iha garantia ida ne’e.

“Ohin ita iha esperansa foun hili ona ita nia reprezenta media na’in ba konsellu imprensa, Susana Cardozu, sei reprezenta ita hotu hanesan na’in ba media, agora ita hein fali reprezentante membru konsellu na’in rua husi jornalista mai tan servisu hamutuk, garante nafatin liberdade imprensa no liberdade espresaun iha Timor-Leste,” tenik nia.

Enkuantu, média ne'ebé rejistu iha Kosellu Imprensa hamutuk 30 maibé iha média sia (9) mak la ativu ona, no tuir votasaun iha 19 no 11 la Vota tanba la marka prezensa.