Ema sira pasa ona iha periode inkubasaun loron 14 iha konfinamentu obrigatoriu ne’ebé estadu prepara hamutuk na’in 996.

Dadus sira ne’e hatudu katak maluk sira neebé mai husi jona afetadu sira hahú menus, nee loke espasu ba instituisaun sira ne’ebé hala’o servisu kordenasaun iha SIJK nia okos, atu bele konsentra liután hodi akompana ema sira kuarantina ho didiak, hafoin kazu sira ne’ebé potensial mosu hodi halo analize laboratoriu hodi kontinua izola sira atu moras ne’e labele hadaet.

Dadus akumulativu hahú husi loron 6 fulan-Marsu mai too ohin (11/4), suspeitu hamutuk na’in 64, na’in rua mak konfirmadu, na’in ida rekoperadu fila ona ba uma, maibé sei kontinua iha kofinamentu volontariu durante loron 14 nia laran, no kazu kofirmadu foun ne’e halo hela tratamentu iha sala izolamentu Vera-Kruz.

Tanba ne’e provijoriamente Timor-Leste kontinua kazu pozitivu ida. “Provavelmente ne’e ema na’in 12 maka sei hein hela rezultadu laboratóriu, na’in 50 hatudu negativu,”dehan nia, liuhusi konferensia impresa, ohin.

Husi dadus hirak ne’e hatudu katak kazu ne’e importadu seidauk iha transmisaun lokal iha Timor- Leste nia laran.

Hakarak apela ba sira ne’ebé hela iha kuarentena laran, atu kontinua disiplina, fasilidade ne’e estadu prepara atu uza hodi halo rekoperasaun, laos atu tuur hamutuk toka no kanta.

Ba sira ne’ebé hela iha kuarentena ne’ebé ema balun konfirmadu ona COVID-19 tuur hakmatek atu nunee pesoal saúde sira hala’o ninia servisu.