Lider na’in rua ne’e ‘sees kotuk’ ba malu dezde diskusaun prosesu formasaun governu. Maibé, hahú hatudu ona vontade di'ak hodi halo diskusaun maski asuntu la’ós kona-ba impase polítika.

Haree ba situasaun ne’e, Parlamentu Nasionál, Bankada Partidu Demokrátiku (PD) konsidera hasoru malu entre lider na’in rua ne’e hanesan abertura polítika ida ne’ebé fó mensajen ba ema hotu-hotu atu hanoin hamutuk hodi kaer metin interese Estadu.

Deputadu Bankada PN, António da Conceição hatete, papél ne’ebé Xanana halo iha estranjeiru hodi negoseia dezenvolvimentu Greater Sunrise no agora daudaun Governu sosa ona asaun ConocoPhillips nian ne’e presiza tau osan.

Osan hirak ne’e sei prevé iha Orsamentu Jerál Estadu (OJE) 2019 nian, tanba ne’e atu viabiliza asuntu Estadu nian kontaktu entre órgaun soberania Presidente Repúblika no Parlamentu Nasionál importante tebes.

“Enkontru sekreta husi Maun Boot Xanana ho Xefe Estadu ne’e pozitivu tebes tanba sira ne’e hatene hela atu halo saida ba nasaun no povu ida ne’e” dehan nia, iha Uma Fukun PN, horisehik.

Haree husi situasaun ne’e foin hatudu loloos konsensu nasionál ba interese Estadu nian atu dada kadoras mai Timor. Konsensu aprovasaun orsamentu la’ós haree ba kuantidade ne’ebé maioria, maibé oinsá bele ho aseitasaun ne’ebé maioria mais kualidade iha ámbitu polítika globál nian.

Tuir nia, pozisaun ne’e atu hatudu kontestu polítika globál hodi pasa mensajen ba nasaun viziñu sira katak Estadu ne’e maski diferente ideia, maibé ko'alia kona-ba asuntu Estadu laiha ema ida atu kontra.

“Ami mós hanoin katak saida mak lider nasionál sira halo ne’e ba povu no nasaun nia di'ak, entaun ami hanesan partidu opozisaun iha PN, maibé ami mós hakarak tane aas interese povu nian”, tenik António.

Nia hatutan, maneira hirak ne’ebé sira hatudu ne’e atu loke dalan hodi halo diálogu, la'ós sentraliza iha lider nasionál de’it maibé tenke hahú mós husi nivel foin-sa'e nian.

Iha PN hanesan opozisaun hodi kontinua hala’o knaar opozisaun nian, maibé hahú ona husi partidu ba partidu nakloke ba malu oinsá atu ko'alia ba malu.

Tanba ne’e, saida mak ohin loron lider sira hatudu daudaun ne’e hanesan mensajen ba jerasaun kontinuadór sira atu hatene rezolve rasik problema ho ulun malirin.