"Ami simu proposta husi asosiasaun hamutuk 30 hodi sosa foos rai no hare kulit husi komunidade agrikultura iha Munisípiu, Bobonaru, Manatutu, Baucau, Vikeke, Kovalima no Manufahi," informa Prezidente CLN, Antonio de Araújo Soares ba Jornalista INDEPENDENTE iha nia knaar fatin, Kolmera, (03/09)

Nia esplika, iha faze dahuluk simu proposta husi asosiasaun 30 no faze daruak 200,maibé agora sei simu hela asosiasaun ne’ebé iha interese nafatin hatama sira nia proposta hodi sosa hare kulit husi komunidade sira. 

"Governu liu husi CLN kada tinan tau osan hodi sosa hare kulit no foos sai husi asosiasaun ka grupu agrikultura hodi tau iha armajen baihira mosu dezastre naturais ka inséndiu ruma governu hodi halo intervensaun imediata,"Katak Nia

Nune'e, iha asosiasaun balun servisu ho ajénsia internasionál entaun sira sosa foos rai ka hare kulit husi komunidade direta hodi lori ba fan iha merkadu internasionál.

"Governu liu husi CLN la bandu komunidade agrikultór sira atu ba foos rai ka hare kulit ba ajénsia internasionál sira ne’ebé presiza esporta ba rai li’ur,"Nia subliña

Iha sorin seluk,emprezáriu lokál husi munisípiu Baukau, Tomas Guterres, informa, sira sosa foos rai ho hare kulit husi komunidade agrikultura maka sira faan fali ba CLN.

"Ami sosa foos rai no hare kulit husi komunidade Agrikultura mak faan fali bá CLN,sosa tau iha armajen bainhira komunidade hasoru dezastre naturais ruma CLN halo intervensaun direita ba komunidade,"Nia konklui.