“Objetivu husi aprezentasaun ne’e mak atu subliña dezafius no lakunas prinsipais iha jestaun no planeamentu forsa traballu Estadu nian, análiza fatór sira ne’ebé kontribui ba aumentu númeru traballadór no despeza ba saláriu no vensimentus, no mós aprezenta rekomendasaun sira ne’ebé ho objetivu atu moderniza mekanizmu jestaun no asegura efisiénsia boot-liu iha utilizasaun rekursus públikus," dehan Komunikadu ne'ebé Online INDEPENDENTE asesu iha Pajina Governu Timor-Leste, Segunda (08/09).
Komunikadu ne’e haktuir tan katak, Inisiativa ne'e tama iha ámbitu Despaxu Primeiru-Ministru nú 02/GPM/I/2025, loron 22 fulan-Janeiru, ne'ebé determina kriasaun grupu traballu ida ba reforma jestaun rekursus umanus iha Administrasaun Públika.
Entretantu, grupu ida-ne’e kompostu husi reprezentante Komisaun Funsaun Públika no Ministériu Finansas, ho responsabilidade atu estuda dimensaun ne’ebé adekuada ba forsa traballu, haree fila-fali sistema karreira no polítika remuneratória, dezenvolve mekanizmu integrasaun entre sistema jestaun rekursus umanus no finanseirus, no mós propoin orsamentu ba formasaun no kapasitasaun pesoál, iha artikulasaun ho Fundu Dezenvolvimentu Kapitál Umanu.
