Portavoz Sentru Integradu Jestaun Krize (SIJK), Rui Maria de Araújo hatete, Komandu Operasional SIJK Primeiru Ministru Taur Matan Ruak, hatuun instrusaun mai SIJK ba forsa tarefa sira iha terenu hahú identifika rai.
“Ita seidauk lansa simitériu, maibé ita foin halo peskiza hodi identifika rai, ita tenke hahú prepara ba senariu ida ne’ebé aat liu,” dehan nia, liu husi konferensia imprensa, iha CCD, ohin.
Rui hatete, governu halo hela servisu atu nunee Coronavirus ne’e labele alastra ba komunidade sira. Maibé preparasaun ba senariu ida ne’ebé aat nian ne’e tenke hahú.
Bazeia ba senariu ne’e forsa traballu husi resposta rapida nian halo ona preparasaun, haree ona fatin.
Bainhira moras ne’e alastra ninia konsekuensia boot ne’e ba ferik no katuas sira ne’ebé ho idade 60 ba leten maka sei hetan susar boot, haree husi númeru populasaun iha Timor ne’e sira barak, entaun presiza preparasaun.
