“Loron ohin loron importante tebes, loron marka fin de sala situasaun ne’ebé halo tranjisaun responsabilidade, ne’ebé sala situasaun assume durante fulan tolu nia laran fila Ministeriu Saúde” dehan PM Taur iha Sentru Konvensaun Dili, horseik.

PM Taur dehan, sala situasaun ne’e mai husi MS tan ne’e hafoin fulan tolu, entrega fila fali ba MS.

“Sala situasaun funsiona tanba deklarasaun estadu emerjensia, nune’e hakarak aproveita oportunidade hato’o parabéns ba ekipa sala situasuan nian ne’ebé halo serbisu di’ak durante fulan tolu, husi ekipa hotu, liu-liu mediku sira”.

“Lori ha’u-nia naran no estadu nia naran ne’ebé hamrik iha sira-nia kotuk dezde eziste, husi cleaner, kondutor sira, tau-matan ba lojistika, no profisional Saúde ne’ebé hamrik iha oin. Sente orgullu loos ho sira-nia serbisu, rezultadu di’ak loos, halakon moras 24 iha ita-nia rai, evita moras ne’e hadaet ba ita-nia inan-aman sira, liu-liu la hetan ema mate,” dehan PM Taur.

Taur hatete, sala situasan mak taka maibé gabinete jestaun krize ne’ebé funsiona iha Primeiru Ministru seidauk fila, sira sei kontinua serbisu hodi haree evolusaun situasaun ba oin.

“Karik iha nesesidade nasaun tomak apoiu, simu responsabilidade kombate moras ne’e, ita sei halo, tanba ita laiha dalan seluk, esforsu sentral mak povu no sidadaun sira,” nia hatete.

Xefe Governu ne’e hatete, ohin loron iha mundu tomak pandemia Covid-19 afeita maka’as no númeru infeitadu no mate sa’e maka’as tebes.

Maske PM Taur orgullu tanba TL konsege livre husi Covid-19, maibé husu nafatin atu kuidadu an tanba pandemia ne’e sei sirkula nafatin iha nasaun barak.

“Konkista ida ne’e la’os sala situasaun nian mesak maibé Timor-oan tomak, estadu Timor no parseiru internasional sira, embaxada, ajensia hotu-hotu nian, hamutuk mak hetan konkista ida ne’e. Maibé seidauk hotu, maske moras iha Timor laiha, maibé moras ne’e sei sirkula iha mundu tomak, no sei la’o hela, nune’e luta ne’e seidauk hotu,” dehan nia.

Tan ne’e, tuir PM Taur, TL tenke prepara an hodi evita no prevene ho meius kumpre nafatin regra sira ne’ebé fó sai husi Ministeriu Saúde no Organiasaun Mundial Saúde.

“Uza (nafatin) maskra, distansimentu social, no fase liman mak importante loos,” dehan nia.

Entretantu, iha oportunidade ne’e, PM Taur mós agradese ba jornalista hotu ne’ebé mak durante periodu EE hamrik iha lina oin hodi hato’o informasaun ba publiku.

“Aproveita oportunidade agradesimentu ba jornalista sira ne’ebé halo kobertura ba serbisu sala situasuan nian, liu-liu ba hirak ne’e iha lina frente infrenta situasaun  covid ne’e hodi fahe informasaun sira ba publiku,” dehan PM Taur.