Kordenador Servisu Jestaun Risku ba Dezastre Naturais Munisipiu Dili (KSJRDN), Helio de Souza Soares Pacheco hatete, apoia ne’e tarde maibé Governu nafatin esforsu hodi responde ba prekupasaun vitima inundasaun sira nian.
"Sasan ne'ebe ami distribui ba vitima 887 ne'e iha oin rua, balun mai husi ita nia parseria World Vision no mós Governu liu husi SEPS rasik, apoia husi World Vizion nian mak sasan dapur nian hanesan bikan, kanuru, sanan, tasu no SEPS mak nesesidade bazika hanesan fos, ikan lata, biskuit no sasan seluk tan,"dehan nia ba Online INDEPENDENTE iha Sede Suku Kampu Alor, Dili, kuarta ne’e (04/08).
Enkuantu, Kordenador ne’e husu ba vitima sira ne’ebé naran laiha lista, tenki halo kordenasaun ho Autoridade Komunitaria, atu nune’e vitima sir abele hetan sira nia direitu.
Entretantu, Xefe Aldeia Anin-Fuik, Franjelino Freitas, agradese ba Governu tanba bele ajuda ona vitima inundasaun sira.
Tanba ne’e, nia husu ba reklamante na’in 182 ne’ebé seidauk hetan apoia nafatin pasensia, tanba Governu sei buka meius hodi resolve hotu.
Iha sorin seluk Cipriano S. hanesan benefisiariu sente kontente no agradese ba Governu maske barak ka uituan, maibé konsege simu ona sira nia direitu.
Tuir nia katak, sasan ne’ebé sira simu kada ema ida hetan fos saka 1, ikan lata 10, no biscuit no mós sasan dapur nia hanesan, sana, tasu bika-kanuru, lona no sasan sira seluk tan.
Asistente Editor: Saturnina da Costa
