Tuir Sekretaria Estadu Protesaun Sivil, Joaquim Gusmão hatete, SEPS iha ona kordenasaun atu servisu hamutuk ho Sefe Suku no Sefe Aldeia sira hodi identifika dadus vitima inundasaun sira, tanba Sefe suku sira mak hatene liu sira nia komunidade.
“Ita konfirma ona dadus sira ho Sefe Suku no Sefi Aldeia ita halo intervensaun ona ba iha komunidade, nune’e iha Dili to’o horseik ita halo ona intervensaun ba komunidade rihun 1.396 familias ne’ebé dadus ne’e konfirmadu,”dehan nia iha Aeroport Nikolau Lobato, (12/04).
Tuir dadus ne’ebé konfirmadu, suku sira ne’ebé SEPS halo ona intervensaun mak hanesan, Suku Bairupite, Manleuana, Bidau Lesidere, Maskarenhas, Santa Cruz, Bemori no mós Metiaut.
Nia hatutan, apoiu intervensaun ne’e ba familia vitima sira ne’ebé hela iha uma.
Tanba ne’e iha sentru evakuasaun sira ne’e naton ona tanba ema barak mak fó apoiu ona iha ne’eba.
Nune’e tuir dadus ne’ebé SEPS verifika ona, komunidade sira iha kapital Dili hamutuk rihun 8.548 kompostu husi suku 15, no tuir data ne’ebé SEPS termina sei apoiu to’o loron 17 fulan abril, hafoin kontinua bainhira populasaun balun seidauk hetan.
Entretantu tuir dadus Provizori horseik loron (11/04), dadus ne’e ofisial husi MAE ne’ebé publika, ema ne’ebé lakon vida no lakon hamutuk na’in 46, populasaun ne’ebé afetadu hamutuk rihun 4.590 no ema ne’ebé agora daduk iha fatin evakuasaun 43 hamutuk rihun 12.378.
Jornalista:Saturnina da Costa
Editor:Jose Sarito Amaral
