Tuir Diretóra Servisu Saúde Munisipiu Dili, Agostinha Segurado, hatete, iha loron 15 fevereiru Sentru Saúde Vera Cruz hahú funsiona hikas hanesan fatin izolamentu hodi halo atendementu ba pasiente infetadu Corona Virus.
“Sala Izolamentu Vera Cruz sei funsiona hikas, hodi atende kazu pozitivu Covid-19 ne’ebé ho tipu moderadu,” dehan nia iha salaun MSSI, Kaikoli, tersa nee (15/02).
Nia esplika, ba pasiente dengue sira neebé durante halo tratamentu iha Sentru Saúde Vera Crus, dadauk nee ekipa saúde munisipiu Dili muda ona ba iha eis-izolamentu Tasi-Tolu.
Tanba nee, fatin refere sei fó fali espasu ba atendementu pasiente neebé infetadu virus corona.
“atualmente to’o ohin dader update ikus pasiente nain rua nulu (20) iha Vera Cruz ita observa tiha ohin muda ona ba Tasi-Tolu no hahú ohin ba oin Sentru Saúde Vera Crus sei hala’o fila-fali tratamentu ba pasiente pozitivu Covid-19 liu liu sira ne’ebé moderadu,”tenik nia.
Entretantu, tuir dadus husi Ministeriu Saúde too loron 14 fevereiru, kazu pozitivu foun Covid-19 iha na’in 117 no rekuperadu 48.
Ho nunee, total kazu ativu neebé dadauk nee iha Sala Izolamentu hamutuk 1.514.
Totak komulativu kazu konfirmadu sura husi loron 21 marsu 2020 too 14 fevereiru 2022 hamutuk 21.748 no óbitu hamutuk 124.
Asistente Editor: Saturnina da Costa
