Xefe Suku Tapo, Xavier da Costa Barreto, hatete, nia parte triste tebes, tanba durante tinan barak ona no Timor-Leste restaura ona ninia independensia ba dala-20, maibé laiha fasilidade saúde hodi halo atendementu ba komunidade liliu inan isin rua sira ne’ebé atu tur ahi ka partus.

Nia dehan, tuir lolos iha Suku Tapo, iha sentru saúde ida, tanba Suku Tapo hanesan sentru ida ba Suku Leber no Oeleu.

Atu nune’e, hodi atende komunidade sira, tanba durante tinan barak ona, komunidade sira terus, bainhira hetan moras ba halo tratamentu iha fatin ka sentru saúde ne'ebé dok tebes husi suku refere.

“Iha suku ne'e, difikuldade ne'ebé ami hasoru mak sentru saúde. Hanesan Xefe Suku, ha’u triste tebes, tanba suku ne’e hanesan sentru ida, hodi akumula komunidade ne'ebé barak, maibe laiha fasilidade atu halo atendimentu ba inan isin rua sira,”dehan nia ba Online INDEPENDENTE, iha edisiu Ministeriu Administrasaun Estatal (MAE), Kolmera, Segunda ne’e (03/10).

Nia hatutan, bainhira komunidade ka inan-isin rua ne'ebé atu partus, hakarak ka lakoi sira tenke la’o ho distansia ne’ebé dok ba iha sentru saúde, iha Postu Adminitrativu Bobonaru Vila nian, hodi halo tratamentu.

Tan ne’e, Xefe Suku husu Governu liu husi Ministeriu Saúde, atu kria sentru saúde ida iha Suku Tapo, hodi halo atendementu ba komunidade sira, nune’e evita sira atu la’o dok.

Enkuantu, nia dehan, kona ba bee moos, iha suku refere laiha difikuldade no mós kondisaun estrada, diak tebes no  komunidade sira bele asesu ho transporte lori produto ba iha merkadu.

Entrentantu, iha Suku Tapo, iha aldeia rua hanesan, Tapo Tas no Tapo Memo ho total populasaun hamutuk 900 no familia uma-kain 250.