Aleinde, iha eskola refere, laiha moru protesaun, inklui bee moos ba estudante sira.

Tuir Koordenadór EBF Ai-Asa, Inacio Vicenti, hateten, desde eskola ne’e eziste, to’o seidauk iha moru protesaun. Tanba ne’e, nia husu ba Governu liu husi Ministeriu Edukasaun Juventudi no Desportu, atu halo konstrusaun ba moru protesaun iha eskola refere.

“Ami nia preokupasaun mak agora kona-ba morru hodi haleu eskola atu bele asegura animal labele tama livre hodi estraga sasan eskola nian.

“Ami nia preokupasaun mak agora kona-ba morru, tan ne’e ami husu ba governu se bele tulun hodi halo konstrusaun morru, nune’e bele asegura animal sira labele tama hodi estraga sasan eskola nian, no mós reabilita eskola ne'ebé sala aula balun kondisaun aat, no ami persiza mós meza, kadeira ba estudante,”dehan nia ba Online INDEPENDETE, iha knar fatin, sabado foin lalais (01/10).

 Nia hatutan, iha eskola ne’e mós laiha guarda seguransa. Aleinde, fatin ne’ebé atu prepara merenda eskolár ba estudante sira laiha, inklui bee moos, tanba durante ne’e estudante ho professor sira uza bee, kuru husu komunidade sira ne’ebé hela besik eskola refere.

“Tein fatin ba merenda eskolár nian laiha, durante ami tein deit iha viziñu nia uma,”nia dehan.

Nia dehan, preokupasaun hirak ne’e, hato’o ona proposta ba parte relevante sira, maibe seidauk iha resposta, nune'e nia nafatin ezizi, atu bele tau atensaun ba eskola sira iha area rural inklui eskola iha EBF Ai-Asa.

Nia haktuir, kona ba merenda eskolár, implementa ona iha eskola refere hahú husi fulan abril to'o setembru hotu ona, nune'e nia husu mos governu atu kontinua nafatin implementa merenda eskola ne’e.

Entretantu, iha eskola EBF Ai-Asa iha professor hamutuk na’in lima (5), husi númeru ne’e iha professor permanente na’in ida (1), kontratu na’in ida (1) no voluntariu na’in tolu (3),

Enkuantu, total sala aula estudante iha eskola refere hamutuk neen (6) hodi akumula estudante na’in 125.