Ministra Solidariedade Sosial no Inkluzaun Veronia Das Dores liu-husi konferensia imprensa hatete, pagamentu pensaun sosial ba idozus ho defisiénsia, sei implementa simultaneamente iha teritoriu laran tomak iha loron 14 fulan-Agusto 2023.
Ministra dehan, ba idozus no difesensia sira ne’ebé iha ona konta bankaria bele ba direita iha Banku Mandiri, Banku Nasional Ultramarino (BNU) no Bank Republik Indonesia (BRI) hodi simu sira nia direitu.
Enkuantu, ba benifisiariu sira ne’ebé mak seidauk iha konta bankaria ekipa husi MSSI servisu hamutuk ho Banku sei halo pagamentu direita ba benifisiariu sira.
“Dekretu lei nu. 53/2022 afirma pensaun Sosial ba ferik ho katuas no difesiensia sira, sei hetan pagamentu montante dolar amerikanu $57 kada fulan. Agora, ita halo pagamentu primeira faze nian ba fulan neen (6) uluk,” dehan Ministra iha Edifisiu MSSI Kaikoli, Kuarta (09/08).
Tan ne'e, Governante ne'e esplika, MSSI simu ona korespondensia husi Banku Nasional Komersiu Timor-Leste (BNCTL-Sigla Portugués) hodi loke pagamentu ba idozu no defisiénsia sira iha loron 14 fulan-Agustu 2023, iha Sede Suku sira iha Munisipiu sira iha teritoriu laran tomak.
“Ami hakarak konvida benifisiariu sira hotu ne’ebé prense ona rekezitus sira atu hakbesik ba fatin designadu ba pagamentu ne’e, labele haluha lori mós kartaun identidade ne’ebé deside ona hodi hafasil prosesu pagamentusira ne’e,” katak Ministra.
Ministra dehan, ba benifisiariu sira ne’ebé ho kondisaun la disponivel atu hakat ba iha fatin pagamentu, ekipa pagamentu mós sei tulun benifisiariu hodi hakat ba iha sira nia fatin hodi bele hetan sira nia osan.
Entretantu, tuir dadus, total benifisiariu ne’ebé governu sei selu iha faze dahuluk tinan ne’e hamutuk 99.564 ne’ebé mai husi munisipiu sira hotu iha teritoriu laran inklui Rejiaun Administrativa Espesial Oekusi Ambeno (RAEOA) ho nia orsamentu hamutuk dolar amerikanu $34.020.798.
