Primeiru Ministru, Mari Alkatiri hateten, programa hirak ne’ebé Governu prepara kompleta ona ho relatóriu hotu-hotu ne’ebé deputadu sira husu. Ne’e duni, prontu ona atu bele submete iha semana oin.

Maski nune’e, Governu hasoru fali dezafiu foun, tanba deputadu sira husi bloku opozisaun Aliansa Maioria Parlamentár (AMP) hatama mosaun sensura ba programa Governu nian.

Programa ne’e sei bele aprezenta ba Parlamentu Nasionál bainhira deputadu sira husi bloku AMP retira fali sira nia mosaun sensura.

“Ami sei haruka programa ba PN ba, se la'ós semana ida ne’e, karik semana oin”, deklara Alkatiri ba Jornalista iha edifísiu ADN Fatuhada Dili, tersa (5/12)

Maski nune’e, bainhira deputadu sira iha Parlamentu Nasionál retira mosaun maka Governu kontinua avansa hodi lori programa ba PN atu diskute.

Antes ne’e, deputadu sira husi bloku opozisaun AMP kompostu husi partidu CNRT, PLP ho KHUNTO aprezenta ona mosaun sensura ba programa governu nian tanba liu ona loron 30, maibé VII Governu seidauk aprezenta hodi diskute iha plenária.