Semana Ida, Uma 34 Hetan Estragus Inklui Ema Na’in Ida Lakon Featured

By Ivonia Varela Jullu 31, 2023 609
Uma ne'ebe hetan estragus husi dezastre nnaturais. Foto:Media Sosial. Uma ne'ebe hetan estragus husi dezastre nnaturais. Foto:Media Sosial.

DILI: Autoridade Protesaun Sivil, iha semana ida nia laran, hahú husi loron 25 to’o 30 fulan-Jullu tinan 2023, rejista uma 34 mak hetan estragus husi dezastre naturais, inklui ema ida lakon.

Diretór Relasaun Externa no Komunikasaun iha Autoridade Protesaun Sivil, Anacleto Caitano, hatete, dezastre naturais ne’e akontese iha munisipiu ualo (8) mak hanesan, Aileu, Ainaro, Baukau, Bononaro, Ermera, Lautem, Líkisa, Vikeke no Rejiaun Administrativa Espesial Oekuse Ambeno (RAEOA).

Nia dehan, dezastre naturais ne'ebé akontese iha tipo tolu hanesan, rai-halai, ahi-han uma no anin boot.

Nia esplika, iha Munisipiu Ainaro, uma 22 mak hetan estragus husi dezastre naturais kauza husi rai-halai.

Iha Bobonaro, akontese anin boot rezulta komunidade nia uma ida (1) hetan estragus.

Iha Ermera uma rua mak hetan estragus, kompostu husi ahi han uma ida no anin boot estragus uma ida.

Aliende, iha Munisipiu Lautem anin boot estragus uma uma ida, Líkisa iha uma ida no mós iha RAEOA iha uma haat mak hetan estragus husi dezastre naturais.

Nune'e mós, akontese ahin-han komunidade nia uma iha Munisipiu Baukau rua (2) no Aileu ida.

Nia akresenta, APS mós rejista komunidade nain tolu hetan dezastre na’in rua hetan kanek no ida lakon to’o agora seidauk hetan.

“Komunidade na'in ida mout iha tasi, kronolojia husi akontesimentu ne’e vitima ho naran Filipe Mateus, idade 57 sai husi uma iha loron 26/07/2023, iha tuku 10:00 dader ba tasi Lagoa Na'an Kuru Natarbora atu ba buka ikan maibé seidauk fila ba uma, maibé familia sira buka hetan deit mak ninia bero, bisikleta no telemovél,” dehan nia iha Salaun APC, Kaikoli, segunda ne’e (31/07).

Diretór dehan, iha loron ne'e kedas Administrador Postu Natarbora informa kedas ba APS Manatuto, ekipa inkliu Komadante APS Manatuto, DNSPP, Bombeirus, Servisu Dezastre Munisipal hodi buka tuir vítima ne’ebé lakon iha tasi Naan Kuru Natarbora maibé to’o agora seidauk hetan.

Entertantu, iha Suku Tirilolo Baukau, ahi-han komunidade nia uma ida no rezulta komunidade na'in ida hetan kanek iha ain-tur ho kotuk laran.

Iha Suku Uaimori Vikeke vitima ho naran Norberto Soares ho idade 65 la'o lakon durante loron ida no fámilia hetan fali ho kondisaun liman tohar no oin bubu.

Entretantu, Diretór ne’e afirma, vitima dezastre naturais 34 iha munisipiu ualo (8) ne'e hetan hotu ona apoiu emerjensia husi APS munisipiu.

Enkuantu, dezastre ne'ebé akontese husi fulan-Janeiru to’o Jullo 2023, APS rejistu komunidade nia uma ne'ebé hetan estragus hamutuk 2.055, husi dadus ne’e iha uma 85 mak hetan ona apoiu rekoperasaun.

Nia haktuir, hela uma 1.063 mak APS kategoriza ona atu hetan ápoiu rekoperasaun iha tempu oin mai.

Ho nunee’e, ema ne'ebé mate tanba dezastre naturais hahú husi Janeiru to’o Jullo hamutuk 25.

 

Rate this item
(0 votes)
Last modified on Segunda, 31 Jullu 2023 16:36

Independente Digital TV