Nia dehan, hotu-hotu presiza perdua malu hodi simu Jesus,  Natal no Tinan foun  ne’e lori paz no prosperu ba Timoroan tomak.

"Tinan ida ne'e Prezidente Repúblika nia mehi atu buka kontribui husi parte hotu-hotu hodi selebra natál ho haksolok, iha dame nia laran, simu malu perdua malu rekonsiliasaun hamutuk iha unidade, soe violénsia, simu dame, simu Maromak nia mensajen dame rekonsiliasaun iha tinan foun 2024, atu Timor haksoit ba oin iha prosesu dezenvolvimentu nasional,"dehan Prezidente Repúblika José Ramos Horta liu husi nia mensajen, (18/12).

Nia hatete, situasaun iha mundu susar tebes ba Timoroan hotu funu bo'ot iha Gaza Palestina, funu nafatin iha Ukrania, problema oin-oin iha nasaun rai barak mosu konflitu.

Nia afirma, situasaun ekonómia aat tebes tanba konflitu sira ne'e tanba potensiál bo'ot sira la tau matan ba malu, la simu malu la halo diálogu, tanba ne'e Timor Leste presiza buka haklean dame.

Nune'e, Timor Leste buka haklean dame, demokrásia, Governu tenke tau matan di'ak ba kiak sira, ba setór privadu, fó tulun ba setór privadu atu setór privadu bele fó empregu hatun dezempregu hadia povu nia moris, dala ida tan hatete natál kmanek tinan foun di'ak liu.

Entretantu, hela semana ida atu selebra loron natál no tinan foun ne'ebé sei selebra iha loron 25 Dezembru.