Enkuantu, kompetisaun dezeñu ne’e, KNDL servisu hamutuk ho The United Nations Children Emergency Fund (UNICEF) hodi realiza iha Timor-Plaza, nune’e anima labarik sira iha loron komemorasaun ne’e, hodi sira bele sente loron ne'e espesial duni ba sira.

“Atividade kompetisaun ida ne'e hanesan animasaun ida ba labarik sira no fó mos oportunidade ida, atu hatudu labarik sira nia talentu liu husi dezeñu no aumenta sira nia kapasidade iha area oin-oin,” dehan Komisaria ba Komisaun Direitu Labarik, Dinorah Granadeiru, iha Timor-Plaza, sabado horseik.

Nia esplika, labarik sira ne'ebé partisisipa iha kompetisaun dezeñu ne'e hamutuk na’in 90.

Ba manan na’in sira husi primeiru to’o terseiru lugar sei simu premiu hanesan Bicikleta.

Aliende, ba manan na’in husi kuartu lugar to’o sestu lugar sei sei hetan mós premiu hanesan kadernu, lapizeira no lapis kores no seluk tan.

Dezeñu ne'ebé sira halo mak hanesan uma, aifunan, aifuan, Jardin, tasi, ikan no kalohan.

Nia hatutan, manan na’in ba primeira to’o sestu lugar mak hanesan, Evlyn Chung Madeira, Nadia Safirah, Geovania Sonia, Alfin Manuel, Antonio Lopes, Alicia Borges, Jasmin Martins.

Entretantu, Manan na’in primeiru lugar Evlyn Chung Madeira (11), agredese no orgullu ba KNDL ho UNICEF ne’ebé organiza ona labarik sira liu husi kompetisaun dezeñu.

“Ha’u sente kontenti no agradese tanba liu-husi kompetisaun ida ne'e ha’u hatudu Ha’u nia talentu ne'ebé iha no ohin ha’u bele hetan primeiru lugar,”nia dehan.

Nia hatutan, dezeñu ne'ebé nia halo mak hanesan, uma, ema no kalohan.

Nia haktuir, iha dezeñu ne’e nia la espera katak atu sai manan na’in maibé iha rejultadu ikus nia konsege hetan premiu ba primeiru lugar no bele hetan duni bisikleta ida.

“Ba oin ha’u nafatin esforsu iha area dezeñu nian hodi hatudu ba katak labarik mós bele no hatudu ba mundu katak Timor-Leste mós bele,”hakotu nia.

Asistente Editor: Saturnina da Costa