Prezidente INCSIDA, Daniel Marçal, subliña katak pasu ida ne'e, mosu husi preokupasaun ba atividade seksu livre ne'ebé lori risku ba transmisaun HIV.

Tan ne’e, nia hatutan, INCSIDA sei halo esforsu atu koalia ho parte kompetente sira, liu-liu parte relijiaun ne’ebé eziste iha Timor-Leste, hahú husi Igreja Katolika, Protestante, Hindu, Budista, no Musulmanu atu oinsa bele iha konseitu ida.

“Ita koordena hela sira-nia hanoin,” dehah Daniel ba Jornalista sira iha resintu INSCIDA, Praia dos Coqueiros, Segunda (06/10)..

Konseitu atu ba harii fatin ba trabaladór seksual komersial ne’e, tuir nia, atu bele kontrola atividade seksual no mós transmisaun virus HIV/SIDA.

“Ita dehan seksu livre ne'e di'ak, se ita halo fatin ba sira ne'e ema, públiku, nia hanoin ne'e dehan katak seksu livre ne'e di'ak estadu ba prepara fali fatin ba sira, maibé laos hanoin hanesan ne'e, justu ita husik livre hanesan ne'e perigozu liu," dehan nia.

Bainhira lokaliza ona, nia dehan, laos de’it bele kontrola atividade seksual no transmisaun HIV, maibé mós kontrolu husi parte moral nian, katak balun hafoin tama lokalizasaun ikus mai hahú konsiente ona katak nia hahalok ne’e la di’ak.

Bainhira la halo fatin no laiha kontrolu, nia hatutan, ema ne’ebé hetan ona transmisaun HIV bele troka parseira tuun-sa’e nune’e transmisaun ne’e mós sei kontinua.

"Ida ne'e parte ida par prevene HIV. Ne'e so regula atividade livre ne'e, hanesan rai seluk. Timor ne'e ita la regula, ita dehan buat la di'ak, ita husik hela de'it, livre hela de'it hanesan ne'e perigu tebes," nia afirma.

INSCIDA, nia hatutan, ko'alia hotu ho parte relevante sira hanesan Igreja maibé tanba balun seidauk fiar katak atividade seksu livre ne'e iha Timor-Leste iha.

Entretantu, tuir dadus husi INCSIDA, kazu pozitivu HIV/SIDA ne’ebé rejistu iha TL rihun rua resin, ne’ebé maioria idade joven.