Portavós estudante Departamentu Politika Publika (DPP), José Alexander Gama hatete, durante ne’e estudante feto sira iha DPP hetan asedu sexual husi dosente no sira la sente seguru bainhira tuir prosesu aprendizajen.
Tuir nia, dosente ho inisial MFB ne’e uza nia poder ho modu oioin atu hetan benefisiu seksual ba nia an rasik.
"Dosente MFB dala-barak ona halo asédiu seksual hasoru estudante sira liu hosi meiu oioin hanesan WhatsApp, kontaktu diretamente, no ho komentáriu fíziku obriga estudante manda fotografia," deklara José liu husi konferensia imprensa, iha UNTL, Kaikoli, Segunda (06/10).
Iha fatin hanesan, Estudante DPP, Martinho da Costa, husu ba Reitor UNTL atu demite dosente MFB.
"Hahalok husi dosente ne'e laos foin akontese iha tinan ne'e, maibé nia profisionál tebes ba aktu ne'e, estudante feto sira atu hato'o keixa maibe evidénsia la forte, nune'e ohin ami iha evidénsia naton ona atu hato'o keixa," katak nia.
Daudauk ne’e, nia dehan, sira-nia parte asegura ona evidensia tolu, no sei tenta atu hetan mós evidensia balun husi vitima seluk.
"Daudaun ne'e ami asegura ona evidensia tolu, maibé seidauk sura ho hirak ne'ebé seidauk espresa sai, tanba vitima sira ne'e balun hetan presaun husi sira-nia laen, kolega, no familia, entaun mensajen ne'ebé dosente ne'e haruka ba hamoos hotu," dehan nia.
Estudante ne’e husu mós ba Alfela, Rede Feto no Ju,s, atu halo aprosimasaun no enkoraza vitiima sira atu bele lori prosesu ne'e ba oin.
"Maibe probelema ida ne'e laos ami de'it mak levanta, maibe iha familia vitima balun mos prosesa ona kazu ida ne'e ba Ministeriu Publiku," Martinho relata.
Iha fatin hanesan, Alumni Estudante DPP, Nelizia konta esperensia moruk ne’ebé nia kolega balun hasoru bainhira sei hala’o estudu.
"Iha sementer 6 ami ezame orál ba materia Jestão dos Projetos, no iha ezame ne'e duni mak kolega sira hetan asedu seksual. Entaun ha'u tauk no fila ba uma relata ba ha'u-nia pai katak ha'u lakohi tuir ezame tanba ha'u lakohi dosente halo fali asedu seksual ba ha'u," katak nia.
Iha momentu ne’ebá, nia hatete, nia pai kontaktu kedan Reitor no informasaun refere konsege espalla iha kampus.
Ho ida ne’e, iha dosente MFB nia aula, maske Nelizia partisipa, maibé dosente ne’e tau riska ba nia naran.
“Signifika katak ha’u falta maske prezensa iha aula no dosente ne'e amesa atu la fó valor ba ha'u," Nelizia konta.
Ho aktu ne’e, nia dehan, nia sente la seguru no familia deside hodi muda ba kontinua estudu iha Universidade da Paz (UNPAZ).
Ba kestaun ne’e, Dekanu Fakuldade Siénsia Sosiál no Politika, Alarico da Costa hatete, nia labele dehan nia atu fiar ka la fiar ba alegasaun hasoru dosente MFB.
"Ha'u laiha prova ida ne'ebé atu dehan fiar ka la fiar, maibé hein rezultadu investigasaun mak bele dehan ne'e loos ka lae. Ha'u labele kondena uluk se ha'u laiha provas ruma, ne'e bele viola fali ema seluk nia direitu," dehan Alarico.
Tuir Dekanu ne'e, presiza liu husi investigasaun Konsellu Disiplinár nian ba kazu ne'e hafoin bele manda rezultadu ba Reitór.
"Ha'u husu no ko'alia ona ho sira, ami presiza sira-nia kronolojia ne'e, tanba iha universidade iha Konsellu Disiplinár, ita manda ba Reitór mak Reitór manda fali ba Konsellu Disiplinár, hafoin sira halo investigasaun.”
“Ha'u laiha faktu forte ida atu justifika, maibé ita buka alternativa atu rezolve hodi ba futuru labele akontese tan,” dehan nia.
