Tuir Sekretáriu Estadu Kooperativa (SECoop), Arsénio Pereira da Silva hatete, asina memorandum ne’e hanesan kontinuasaun husi governu anteriór nian, ho objetivu atu fo formasaun ba movimentu kooperativa sira ne'ebé eziste iha TL.
"Ba literasia finanseiru depois ita fó formasaun ba implementadór koperativas ki’ik no movimentu koperativas bele implementa sira-nia atividade, uniaun kreditu (CU) liliu sira ne'ebé halo mikro pekenas emprezas sira hodi bele dezenvolve di’ak liután sira-nia atividade ekonomia," dehan Sekretariu Estadu iha Salaun SEKooP Akait, Kinta (11/04).
Governante esplika, bainhira iha formasaun sira, parte SEKooP ho BCTL sei servisu hamutuk hodi fasilita formasaun finanseiru ba movimentu koperativa sira.
Iha fatin hanesan, Governadór BCTL Helder Lopes, hateten, objetivu husi akordu oinsá atu promove finanseriu inkluzivu no promove investimentu ba emprezas mikro kiik no médiu sira.
Tan ne'e, BCTL servisu hamutuk ho SEKooP hodi apoiu movimentu Koperativas iha Timor-Leste.
"Pontu de vista husi BCTL nia mak primeiru oinsá atu promove finanseiru inkluzivu katak servisu finanseira nian to’o ba ema hotu liuliu, ema sira iha área rurais," nia esplika.
Nia hatutan, segundu promove investimentu ba mikro kiik no médiu sira ne'ebé fasilita husi atividade koperativa liuliu iha área rurais. No aktividade negósiu ne'ebé halo husi membru koperativa sira.
Terseiru, liu husi akordu refere BCTL ho SEKoop servisu hamutuk hodi suporta kooperativa iha teritóriu laran tomak atu promove nível konsumu tantu membru ka individu koperativa ne’e rasik no mós sira-nia familia.
Governadór afirma, husi BCTL iha parte tolu ne'ebé importante tebes atu halo kooperasaun hodi implementa programa rua hanesan fó formasaun finanseira ba membru kooperativa, halo sepervizaun monotorizasaun no akompañamentu ba atividade koperativas ho kréditu uniaun sira iha TL.