Tuir Reprezentante Santa Sé ne’e, informasaun ne’ebé espalla kona-ba Amu Papa nia vizita sei sai nu’udar rumoris de’it.

“Kona-ba (vizita Amu Papa)… ha’u no ita hotu optimista maibé seidauk simu komunikasaun ofisial ne’ebé deklara loloos, hanesan iha Indonezia tau iha media ne’e hanesan rumoris no boatus de’it, seidauk iha komunikasaun ofisial,” dehan Monsenhor Marco hafoin hasoru-malu ho Primeiru Ministru Taur Matan Ruak, Kinta (30/01).

Entretantu, kona-ba situasaun atual ne’ebé TL hasoru daudauk, Monsenhor Marco dehan, Amu Papa Francisco manifesta konfiansa ba lider Timor Leste sira atu tuur hamutuk hodi buka solusaun ba aspektu hotu hodi bele hadia povu-nia moris.

Iha ninia vizita kortejia hasoru Prezidente Repúblika Francisco Guterres Lu Olo no Primeiru Ministru Taur Matan Ruak, Reprezentante Santa Sé ne’e dehan, hakarak manifesta apoiu maka’as husi Amu Papa no Santa Sé.

“Manifesta apoiu maka’as husi Papa Francisco no Santa Sé atu dirije estadu (TL) iha aspektu hotu.”

“Ami  enkoraja direjentes politikus hamutuk hatudu sentidu ne’ebé iha ona no halo ona hodi  haree ba objetivu lider sira nian ba povu-nia moris loloos ho loos ba hotu-hotu,” dehan Monssenhor Marco.