Sekretária Estadu no Igualdade Elvina Sousa de Carvalho hatete, senkontru ne'e mós hanesan enkontru dahuluk ne'ebé Sekretária Estadu ba lgualdade (SEI) hala'o humutuk ho Parseiru Internasionál sira hodi hatene programa kooperasaun ne'ebé SEI ho parseiru sira estabelese ona, liuliu progresu, dezafiu no hanoin sira ne'ebé presiza koopera hamutuk hodi atinje objetivu ba promosaun igualdade iha rai-laran.
“Sorumutu ne'e ho objetivu atu kontinua harii parseria ida-ne'ebé forte ho parseiru hotu-hotu nasionál no internasionál ne'ebé foka liu ba igualdade jéneru, empoderamentu feto no inkluzaun,” dehan Sekretária iha Suai Room Timor Plaza, Kinta (10/08).
Sekretária dehan, hanesan ema hotu hatene ona katak iha loron 19 fulan-Jullu, Parlamentu Nasional (PN) aprova ona Programa Governu Konstitusional ba dala sia (9) iha tinan lima oin mai.
“Iha inísiu, ha'u hakarak hato'o fali kompromisu Governu nian atu hadi'a igualdade jéneru, protesaun no promosaun direitus umanus feto nian, no ami fó importánsia boot ba kooperasaun ho parseiru hotu-hotu,"hatutan SEI.
Governante esplika, Timor-Leste halo ona progresu iha atinji igualdade jéneru no Governu Konstitusional ba dala sia konsidera igualdade jéneru no empoderamentu ba feto no labarik-feto sira sai nu'udar dezenvolvimentu sosiedade inkluzivu.
Relasiona ho ida-ne'e, TL kontinua iha kompromisu atu asegura katak feto, labarik-feto, ema ho defisiénsia no grupu vulneravel sira seluk envolve ativamente iha dezenvolvimentu polítika, lei no programa sira atu asegura katak polítika, lei no programa no orsamentu governu nian reflete no responde ba sira-nia nesesidade oin-oin.
Ho nune’e, SEI kontinua buka atu servisu hamutuk ho Ministériu setorial hotu-hotu no iha parseria ho parseiru dezenvolvimentu sira no mós sosiedade sivíl sira atu integra aprosimasaun prinsipál ida kona-ba jéneru iha polítika, lei, programa no orsamentu governu nian hotu-hotu atu asegura feto sira-nia direitu sira hetan apoiu no kumprimentu.
Ba tinan lima oin mai ema hotu tenke halo esforsu konsultadu iha setór hotu-hotu relasiona ho implementasaun kompromisu governu nian kona-ba alkansa igualdade jéneru inklui implementasaun Rekomendasaun Konkluzaun Komisaun CEDAW nian”, tenik SEI.
Tan ne'e, fiar katak, hapara diskriminasaun hotu-hotu hasoru feto no labarik-feto sira no asegura inkluzaun feto no labarik-feto sira-nian iha prosesu foti desizaun, la'ós de'it direitu umanu báziku ida, ne'e esensiál ba kresimentu ekonómiku sustentavel no dezenvolvimentu nasionál.
"Tanba ne'e, diskusaun ohin nian sei ajuda ita hotu atu haree, oinsá mak ita bele hametin ita-nia parseria no koordenasaun no mós servisu hamutuk hodi alkansa ita-nia objetivu komún sira," dehan Governante ne'e.
Iha fatin hanesan, Xefe UN Women iha TL Nishtha Satyam senti kontenti tebes tanba bele hamutuk ho SEI atu bele hare saida mak prioridade Governu ninian liu husi SEI no oinsa atu servisu hamutuk kona-ba asuntu Ingualdade.
"Ida mós la'os UN Women ho SEI de'it, maibé bolu atensaun husi parseiru hotu oinsa bele servisu hamutuk hodi apoiu prioridade Governu nia servisu liliu SEI," dehan Xefi UN Women.
Nia dehan, UN Women nia servisu mak atu apoiu SEInia servisu prioridade sira inklui mos servisu loron 120 nian.
Nune'e mós atu hare programa hakbiit feto no partisipasaun feto hodi foti desizaun no vida polítika no mós programa feto pasiva
