Seguransa Eskola Kafé Likisá, Marselino Vitor (45) hatete, iha Eskola Kafé Likisá ne’e seguransa na’in tolu maka durante ne’e apoia prosesu funsionamentu eskola ne’e nian.

Atu dehan ema ne’ebé kontaktu direita ho professor sira ne’e hanesan seguransa iha ne’e mós tama kategoria hotu entaun presiza iha teste ruma atu bele hatene.

“Ami seguransa iha na’in tolu, Xefe Professor ne’ebé pozitivu ona ne’e dala ruma nia ka’er labijeira fó fali ami priense lista prejensa, nia taka loke odamatan, ami mós ba ka’er tutan, ho ida ne’e ami hein hela parte saúde sira atu mai foti amostra ruma para ba koko iha laboratóriu, maibé ema la mosu mai to’o agora,” dehan nia, iha Eskola Kafé Likisá, ohin.

Nia konta, professor Portuguêz ne’ebé hanorin iha Eskola Kafé ne’e hamutuk na’in 10.

Enkuantu professor Timor-oan na’in 10-resin, ne’e seidauk sura ho estajiariu, no funsionariu seluk, to’o oras ne’e mós seidauk hasai sira nia amostra ruma, maibé foin maka hasai kondutor nia amostra no nia rezultadu hatudu negativu.

Seguransa sira husu ba Ministériu Saúde atu foti mós sira nia amostra ruma hodi ba koko iha laboratoiu, tanba lakohi atu moras ne’e alastra hodi estraga komunidade enjerál.

Segurasan na’in tolu iha eskola ne’e maka hanesan, Marselino Vitor (45), Mateus Carles Santos (38), Francisco Goveia Leite (35).

Entertantu iha fatin ketak, Jornalista INDEPENDENTE tenta konfirma ho Vise Diretora Eskola Kafé Likisá, maibé rejeita hodi fó informasaun.

Iha fatin ketak, Direitóra Saúde Munisipiu Likisá Apolonia dos Santos hateten, ekipa epidemolojia iha Likisá oras ne’e hahú halo ona triajen hodi identifika ema ne’ebé hamosu sintomas hanesan COVID-19 nian.

“Liu husi triajen ami hasai ona amostra ema na’in neen ne’ebé hamosu sintomas hanesan COVID-19, maibé ita la’os dehan sira COVID-19 hodi ba teste laboratoriu no na’in 11 ida ne’ebé hanesan uma na’in ne’ebé professor sira aluga nia uma ne’e la hamosu sintomas maibé sira ne’e ita deskonfia,”dehan nia, iha knaar fatin Likisá, ohin.