Enkuantu, traballadór na’in hirak kompostu husi mane na’in 36 no feto na’in 20, sira ne’e mesak traballadór tuan deit, ne’ebé agora kompañia bolu fila-fali ba servisu.

 Reprezentante Sekretáriu Estadu Formasaun Profisionál Empregu, Xefe Gabineti  Jacinto Ribeiro Dias husu ba traballadór sira atu kumpri nafatin regras ne'ebé estabelese ona iha kontratu, atu nune'e labele taka dalan ba timoroan sira ne'ebé hein hela oportunidade atu ba servisu.

Nune’e, mós husu ba traballadór sira atu labele sai husi sistema no labele lori arte marsiais no arte rituais ba ema nia nasaun.

Nia dehan, traballadór sira ne'e ba lori identidade Timor nian, tan ne'e husu atu respeita ema nia kultura nasaun nian, tanba kultura Timor ho kultura Australia la hanesan.

“Asina deklarasaun ne’e kontinua komprimisiu estadu liu husi SEFOPE traballadór no inan-aman atu nune’e bainhira sira servisu iha kompañia, bele servisu ho responsabilidade,”dehan nia, iha Edifisiu SEFOPE Kaikoli, Sesta (06/10).

Iha fatin henesan, Traballadora Rosalia V. Pereira Paialina, senti kontenti no agradese ba kompañia ne’ebé nafatin fó fiar ba nia hodi ba servisu iha Australia.

Tuir nia, maske servisu ne'ebé sira halo ne'e todan maibé ajuda ona sira hodi sustenta ekonomia uma laran no ajuda alin sira nia eskola.

Nia dehan, osan ne'ebé durante nia hetan hahú servisu fulan neen (6) iha Australia, hodi ajuda ona familia, halo uma no mós loke negósiu hanesan mini pertamina ne'ebé dadaun ne'e iha ona prosesu nia laran.

Enkuantu, traballadór na’in 56 ne’e sei aranka ba Australia iha loron 08 no loron 09 fulan-Outubru tinan ne’e.

Entretantu, tuir dadus, total traballadór sira ne’ebé ba servisu ona iha Australia hahú inisiu to’o 2023, hamutuk 3.164 ne'ebé kompostu husi mane na’in 2.160 no feto na’in 1.005.