Tuir observasaun jornalista Online INDEPENDENTE nian iha terenu hare katak, membru Governu sira ne'ebé presta omenajen ba kadaver Pe.Domingos nia mak Vise-Primeiru-Ministru Ministru Koordenadór Asuntu Ekonomiku no Ministru Turizmu no Ambiente Francisco Kalbuadi Lay, Ministru Justisa Sérgio da Costa Hornai, Ministru Prezidensia Konsellu Ministrus (PCM), Ministru Finansas (MF), Sekretáriu Estadu Terras Propriedades no mós Sekretáriu Estadu Kooperativa.
Aleinde ne’e, iha mós orgaun sira seluk ne’ebé presta mós omenajen ba Padre Domingos Maubere nia maktoban mak, Gabinete Apoiu Sosiedade Sivil (GASS), Konsellu Imprensa Timor-Leste (KITL), Komisaun Funsaun Publika (KFP), Komisaun Anti Korupsaun (KFP), Autoridade Protesaun Sivil (APC), Kooperativa Kafé Timor-Leste (CCT), Hospital Nasional Guido Valadares (HNGV), Autoridade Nasional Petroleu Minerais (ANPM), Eletrisidade Timor-Leste, Empreza Públika (EDTL,EP), RENETIL, Sentru Nasional Chega (CNC) Komité Sentrál FRETILÍN (CCF) no mós Sarani sira husi Parokia oioin, inklui Madre no irmán sira husi kongresaun oioin.
Observa mós katak la’ós deit presta omenajem no halo orasaun ba Padre Domingos iha Igreja Bekora, maibé sarani sira iha Parokia ida-idak iha Munisipiu mós kontinua hala’o misa agradesimentu ba Pe. Domingos.
Enkuantu, tuir orariu, serimonia misa funebre ba Padre Domingos Maubere hala’o iha segunda, loron 19 fulan-Maio tinan ne’e, iha Igreja Katedral, Dili, iha tuku 10:00 otl.
