Situasaun ne’e hamosu pergunta husi sosiadade sivil sira ba seriedade MS hodi prosesa pesoal enfermeira ne’ebé halo asaun kontra lei.
Diretór Ezekutivu Forum Organizasaun Naun-governamental Timor Leste (FONGTIL) Daniel dos Santos konsidera MS laiha seriedade hodi prosesa kazu pesoal enfermeira naok aimoruk iha HNGV.
“MS ita haree katak laiha seriedade tanba ladun seriu prosesa kazu ne’e atu bele iha rezultadu, nune’e bele fó informasaun ne’ebé lo’os ba públiku, tanba públiku hatene ema ne’e komete ka ema ne’e lori sai aimoruk maibé nia rezultadu tuir regra ne’e óinsa?,” dehan Daniel iha nia knar-fatin, Kaikoli, Segunda (13/01).
Diretór Ezekutivu ne’e dehan, MS, Komisaun Funsaun Públika (KFP) no HNGV rasik tenke seriu prosesa kazu ne’e tanba atetude husi pesoal enfermeira ne’e halakon estadu.
“FONGTIL preokupa (Komisaun) Funsaun Públiku, Ministériu Saúde ho HNGV hanesan instituisaun sira ladun seriu implementa regra sira, liu-liu liga ho kazu ida ne’e”.
Bainhira instituisaun kompetente sira la seriu prosesa kazu ne’e, Daniel deskonfia mosu rede mafia hanesan buat ne’ebé durante ne’e ema balun koalia.
Molok ne’e, enfermeira ida ho inisial DX ne’ebé deskonfia lori sai aimoruk husi Hospital Nasional Guido Valadares (HNGV) deklara katak kaixa haat ne’ebé nia tula dala rua la’os aimoruk, maibé soru-been.
Enfermeira ne’e mós hatete katak, nia la lori soru-been ba klinika hodi fa’an, maibé nia foti sai atu ba salva ema-nia vida.
“Ha'u la hasai ai moruk husi ospital. Maibé ha'u foti soru-been de'it. Maibe kuandu sira temi aimoruk ne'e ambolas ida ka tablet ida mós hau la foti sai. Soru-been loos de’it mak ha’u lori sai ba uma. Mais ida ne'e mak agora sira duun fali ha’u lori sasan, aimoruk husi ospital depois ha'u-nia primu mak tula sai ho karreta ba faan iha perbatasan ka Atambua ne'ebá, ne'e la loos,” deklara DX iha Novembru 2019.
DX mós hatete, nia la simu akuzasaun iha media sosial Facebook katak nia hasai aimoruk husi HNGV hodi ba fa’an iha klinika privadu balun.
"Ha'u la lori ba faan ba klinika mais ha'u lori ba hodi salva ema-nia vida. Dala ida tan, ha'u la'os foti sai soru-been ne'e ba faan hodi ha'u bele haan no hemu e ohin loron bele selu ha'u-nia oan sira-nia eskola, ne'e la'e. Ha'u foti ne'e atu salva ema-nia vida,” DX afirma.
Kona-ba pasiente ne’ebé nia fó asistensia ho soru-been ne’ebé nia lori sai, DX dehan, molok ne’e pasiente ne’ebé nu’udar mós nia apa kiik ne’e hetan operasaun dala rua iha HNGV hafoin rekopera, pasiente ne’e alta no DX lori fila ba Laivai, Munisipiu Lautem.
Maibé, iha 6 Novembru, nia apa kiik sofre moras no lori fila fali mai Dili. Nia husu atu ba halo tratamentu iha HNGV maibé nia apa kiik ne’e rekuza, ho nune’e DX deside hodi fó rasik asistensia saúde.
Nia rekoñese katak, nia foti soru-been kaixa haat. Kaixa rua nia foti iha 8 Novembru no kaixa rua seluk foti iha 12 Novembru.
“Ha’u laiha transporte entaun ha’u telefone ba ha'u-nia primu mak mai ajuda tula lori ba ha'u-nia uma,” nia esplika.
