Maske nune’e, tuir monitorizasaun ne’ebé asosiasaun HAK halo ba prizaun Bekora, Gleno, no Suai hatudu katak, prizioneiru balun la koñese sira-nia advogadu ka defensor.

Diretór Asosiasaun HAK, Feliciano de Araujo informa, HAK halo monitorizasaun ba prizaun tolu hodi hatene kondisaun prizioneiru sira, bem estar guarda prizional sira, no mós kondisaun no fasilidade sira iha prizaun Bekora, Gleno no Suai. 

Iha monitorizasaun ne’e, nia dehan, HAK deskobre katak prizionieru sira seidauk hetan asistensia ne'ebé efetivu husi defensor publika.

“Tuir  dadus monitorizasaun iha tinan 2024 iha prizaun tolu ne'e, husi prizionierus 143 ne'ebé HAK intervista iha prizioneiru 20% (kuaze na’in 29) la konese defensor públika no 71% mak koñese," informa nia.

Ba sira ne’ebé la koñese sira-nia defensor, nia dehan, fó impaktu tanba laiha asistensia ka follow up ba sira-nia kazu.

Tuir informasaun ne’ebé Jornal INDEPENDENTE asesu husi eis prizioneiru ida ho inisial ASB, ne’ebé tama prizaun durante tinan lima nia laran katak, durante iha prizaun laran nia nunka haree ninia defensor nia oin.

“Balun mai hasoru no koalia ho sira-nia kliente, mais ha’u ho ha’u-nia kolega balun laiha to’o ami sai tiha de’it,” dehan nia iha dada-lia ida.

Hafoin sai husi prizaun, ASB hatete, nia foin konsiente katak loloos nia tenke hetan asistensia ne’ebé masimu husi defensor ida nune’e bele defende ninia direitu no garante tratamentu ne’ebé justu durante iha prizaun.

“Maibé la buat ida. Grasa ba Maromak tanba ha’u sai ona, no agora ha’u la presiza ona sira,” dehan nia ho oin-midar.