Portavós Konsellu Estadu no Konsellu Superiór Defeza no Seguransa João Aparicio Guterres hatete, Prezidente Repúblika José Ramos Horta konvoka reuniaun ho membru sira Konsellu Superior Defeza no seguransa nian, ho ajenda ida atu haree hamutuk knaar esensiál husi instituisaun Estadu nian hanesan FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL) no Polísia Siéntifiku Investigasaun Kriminál (PSIK) kona-bá kontrolu armamentu no monisoens.
“Iha parte ida atu hametin diak liu-tán kapasidade hodi garante páz, seguransa no estabilidade iha rai-laran,”dehan Portavos Portavós, iha Palásiu Prezidensiál Nicolau Lobato, Aitarak-Laran, segunda (07/04).
PortaVós Konsellu Estadu hatutan, iha parte seluk atu garante seguransa bá populasaun, mantein órdem públika iha Timor-Leste no partisipasaun ativa husi sidadaun sira hotu bá seguransa nasionál.
Ne’e duni aspeitu importante liu iha reuniaun ne’e maka koalia kona-bá kontrolu rigorozu tebes kona-bá uzu arma no koordenasaun nível ne’ebé aas.
“Iha parte seluk, realsa mós treinamentu no kapasitasaun ba instituisaun tolu ne’e, iha pontus barak maibé sobre sai deit rua tenki iha disiplina no étika bainhira uza kilat ka armamentu,”tenik nia.
Enkuantu, iha enkontru ne’e konvoka husi Prezidente Repúblika José Ramos Horta, partispa husi Primeiru Ministru Kay Rala Xanana Gusmão, Ministru Justisa, Ministru Defeza, Komando Jeral PNTLno membru sira seluk.
