Saudozu Renan Selak nu’udar veteranu ida ne’ebé luta hasoru okupasaun Indonezia durante tinan 24 nia laran.

Renan Selak nia iis kotu iha HNGV iha Kinta (10/09) tuku 12.00 Oras Timor-Leste (OTL) hafoin hala’o tratamentu durante loron 10 nia laran.

Tuir informasaun, Renan Selak hetan moras iha inisiu Setembru iha ninia rezidensia iha Lospalos, Munisipiu Lautem, hafoin elikoptru evakua kedan mai baixa iha sala ICU, HNGV.

Iha fulan hirak liu ba, Renan Selak sofre ataka kurasaun no konsege rekupera hafoin halo tratamentu saúde iha rai li’ur.

Maibé, foin lalais ne’e, Renan hahú moras fali no parte governu prepara ona dokumentus atu lori sai saudozu ba Malazia hodi halo tratamentu saúde.

“Saudozu nia moras ne’e dokumentus kompletu hotu ona atu lori saudozu sai ba Malazia maibé heian hela aviaun, derepenti nia mate, dala-ruma ba mós tuir médiku sira hatete dala-ruma ba mós la to’o Malazia,” informa Ministru Asuntu Kombatentes Libertasaun Nasionál Julio Sarmento “Meta Malik” iha mortuario HNGV, Kinta (10/09).

Meta Malik hatete, governu sente lakon tanba foin mak harii Konsellu Veteranus no Renan Selak mós sai nu’udar Vise Prezidente Konsellu Veteranus.

“Ba saudozu ne’e ninia oan sira lalika preokupa tanba governu iha rasik polítika atu fó resposta ba situasaun sira hanesan ne’e, ne’ebé lalika preokupa, apoiu ba familia ba iha ninia mate rasik no sira rasik mós idaidak iha ninia kontribuisaun rasik ba rai ida ne’e, ne’ebé governu tau sira-nia konsiderasaun sira ne’e,” hatete nia.

Nia dehan, governu la ses no la husik responsabilidade ida ne’e, maibé governu sei fó atensaun ba familia.

Xefe Estadu Maior Falintil Forsa Defeza Timor-Leste, Maijor Jenerál Lere Anan Timur hatete, mate nu’udar dalan uniku ba ema ne’ebé moris iha mundu ne’e, importante mak tenke fó onda no dignifika sira ne’ebé mate.

“Ba sira ne’ebé moris no ba ita ne’ebé sei moris ba sira-nia mate ita deve sira tanba sira mate ona, sira eroi, sira mak asuwain ba rai ida ne’e no ita la’o tuir sira-nia ain fatin hodi ita-nia nasaun ne’e ba oin, moris iha dame, hakmatek nia laran to’o progessu dezenvolvimentu,” dehan Lere iha mortuaria HNGV.

Durante tempu okupasaun Indonezia, Renan Selak hala’o luta iha rejiaun Ponta Leste. Nia hahú nu’udar militar, maibé dezde tinan 1981, Renan sai hanesan Kuadru Polítiku Sekretáriu Rejionál Ponta Leste no ukun an.