"Rekrutamentu PNTL ha'u kansela, tanba dezenvolvementu institutusaun hotu-hotu inklui PNTL tenke tau matan mós ba ita nia ekonómia. See hahán uitoan ita hatama ema barak ne'e kualidade laiha, hahán la to'o, ita problema," dehan nia, iha Palasiu Prezidensiál, Bairru-Pité, horisehik.
Nia dehan, bainhira Xefe Governu nu'udar Jenerál planu mak F-FDTL só 2020 liu mak nia foin atinji 3.000 no ida ne'e hatudu duni, tanba husi 2000-2022 sira foin atinji númeru 2.600 no PNTL rasik sa'e tiha 4.000 depois hakarak aumenta osan, hahán no sira hanoin de'it ka kiik sira iha foho ne'e halo nusa entaun la rekruta.
Nia hateten, rekrutamentu ba PNTL hodi aumenta forsa tenke haree mós ba amesa no risku tanba labele hatama ema depois ba han de'it, ejize saláriu de'it depois tuur de'it kajerna ida ne'e labele tenke servisu.
"Ha'u dehan ba sira bainhira ha'u mak Ministru Interiór no Primeiru Ministru PNTL ninia rekrutamentu laiha, izola ida ne'e no ha'u nia prióridade mak sira ne'ebé atinji ona tinan 60 tenke ba deskansa nune'e tenke altera lei para sira Idade 60 ba deskansa joven sira avansa, se lae katuas ona la'o hotu labele no hanoin mós la la'o nafatin de'it no joven sira fatin laiha," hateten nia.
Molok ne'e, Vise Ministru Interiór António Armindo hateten, planu halo rekrutamentu ba ajente Polísia Nasionál Timor-Leste (PNTL) foun hamutuk 720 iha tinan 2023.
"Ita hatene membru PNTL daudaun ladauk sufisiente, nune'e númeru ne'e ita presiza aumenta tan, tanba ita hatene membru PNTL balun moras no barak mak mate ona. Tanba ne'e tuir planu ita sei halo rekrutamentu iha tinan oin ( 2023 ) hamutuk 720," dehan nia.
