Portavoz Komandu Jeral F-FDTL, Kapitaun Enjenaria José Antonio Nune da Costa hatete, bazeia ba enkotru Konsellu Ministru deside no aprova ona katak iha tinan 2022 sei halo rekrutamentu ba soldadu prontu foun ba F-FDTL hamutuk 600 hodi tama iha instititusaun militar.
Nia informa, kriteitu ba rekrutamentu iha tinan ida ne’e mak hanesan; aplikante tenke iha idade minimu tinan 18 no masimu tinan 25, mane ho altura 165 sentimus no feto ho altura 158 sentimentru, aptisaun fizika aplikante tenke iha fizika natoon, labele iha moras todan hanesan HIV/SIDA, TB, Hepatitis no seluk tan, no aplikante tenke sidadaun orjinal Timor-Leste.
Atu elimina aplikante sira ne’ebé la priense kriteriu jerais no espesiais, nia dehan, se la pasa ezame medika sei hasai kedas no sei la tuir tan teste sira seluk.
“Tanba ne’e aplikante sira ne’ebé mak la pasa iha teste fiziku, piskoteste, entervista no eskrita no laos sidadaun orijinal Timor-Leste, inklui laiha lealidade no senseriadade, komete tiha ona krime publiku no sivil, komisaun sei hasai kedas iha prosesu teste nia laran,” dehan Kapitaun Enjenaria ne’e liu husi konferensia imprensa iha Kuartel Jeral F-FDTL, Fatuhada, Dili, Kinta (21/07).
José dehan, iha semana liu ba komisaun hasai ona avisu ba públiku tomak hodi husu ba inan-aman, maun-alin, ferik ho katuas, no autoridade sira katak rekrutamentu ida ne’e nu’udar rekrutamentu voluntariu ba sidadaun Timor-Leste hotu-hotu hodi konkore tuir kriteriu ne’ebé iha.
“Rekrutamentu ida ne’e voluntariu, signifika katak nia liu karik nia mai servisu durante fulan 18 tuir rezime voluntariu ne’ebé iha, depois rezime voluntariu nia passa mak sei halo rezime kontratadu ba nian ba dois em dois anos, durante tinan hitu fila ba vida sivil ka konkore ba teste kuadru permante.”
Nia esplika, bainhira liu ona rezime nu’udar kuadru permanente mak foin bele konkore ba eskola formal por eskrita militar, depende ba avaliasaun atu hare oinsa sir-nia progresaun kareira ba future.
“Ne’e signifika katak presiza tempu no pasiensia, ne’e laos fasil. Tanba ne’e, husu ita-boot sira katak laos objetivu ida ne’e di’ak liu lalika gasta tempu, buka dalan korta fasil iha vida militar nian no ba inan-aman, kataus no ferik, maun-alin sira, lalika lakon tempu atu buka ema ruma, atu enkosta ema ruma, buka hasoru ema ruma iha servisu fatin no fatin seluk hodi buka rekomenda oan, alin, ka beioan sira mai iha ne’e.”
“Tanba ne’e rekrutamentu soldadu foun F-FDTL ida ne’e ba sidadaun hotu, feto no mane, kriteriu mak manda iha ne’e, la haree ba kór no la haree ba familia ho rekomendasaun espesial ne’e la eziste, tanba ne’e atu rekomenda ba see-see de’it, sei tau hamutuk iha fatin ida no sei taes tuir kriteriu ne’ebé mak envigor.”
“Rekrutamentu ida ne’e, rekrutamentu ba soldadu prontu nian, ita apela liu-liu ba entidade hotu-hotu atu ajuda instituisaun F-FDTL hametin sistema normal no regulamentu relavante sira ne’ebé estadu kria tiha ona ba nasaun nia di’ak,” deklara José.
Molok ne’e, Koordenador Jeral Daruak ba Kominsaun Rektrutamentu F-FDTL, Tenente Koronel Mário Baptista “Bersama” informa, kadidatu membru F-FDTL ne’ebé adminidu ona iha lista ne’ebe taka sai iha 15 Jullu hamutuk na’in 1.421.
Husi kandidatu 1.421 ne’e kandidatu 1.305 sei tuir teste mediku, psikoteste, entrevista, no teste físiku, enkuantu kandidatu rezervadu na’in 116 sei tuir de’it teste saude, tanba iha tinan 2021 sira liu ona teste, ba tinan ne’e konfirma de’it sira-nia saude.
“Kadidatu sira ita sei fahe ba grupu rua, sei mai aprezenta sira-nia dokumentus ba komisaun sira hahú iha loron 24 Jullu tuku 03:00 to’o iha 05 Agostu tuku 03:00, inklui kandidatu rezervadu hamutuk 116 ne’ebé molok ba tuir teste iha Sentru Formasaun Treinu Metinaru,” dehan Mário.
Grupu dahuluk ne’ebé sei aprezenta aan no dokumentus ba komisaun hahú iha 24 Jullu iha Kuartel Jeral F-FDTL, Fatuhada, Dili, mak husi munisipiu Díli, Ataúro, Likisa, Ermera, Aileu, Manatuto no Baucau, hafoin grupu daruak husi munisipiu Lautem, Vikeke, Manufahi, Ainaro, Bobonaro, Kovalima no RAEOA, ikus mak kandidatu rezervadu na’in 116 sei aprezenta aan iha 5 Agostu.
“Kandidatu idaidak ne’ebé sei aprenzenta aan tenke hatudu kartaun vasina dala rua ho bom komportamentu ne’ebé renova ona, inklui dokumentu sira ne’ebé hatama ona iha tinan kotuk, ita halo konfirmasaun molok sira ba tuir teste,” dehan nia.
