Diretór Nasionál PSIK, Vicente Fernandes e Brito hatete, rezultadu husi investigasaun PSIK nian, identifika indikasaun bá krime diskriminasaun relijiaun no krime seluk tan, ne'ebé agora tama ona iha prosesu legál no nia autoriza ona investigador pikete atu remete auto prosesu ne'e bá Ministériu Públiku.
“Krime ne'e diskriminasaun relijiaun ho krime seluk ne'ebé ha'u la lembra ona, maibé ha'u autoriza ona investigador ne'ebé pikete bá kazu ne'e, remete kedas auto notisia bá Ministériu Públiku,” Dehan nia, iha Kolmera, Sesta (12/6).
Nia hatutan, atu kontinua Ivestigasaun PSIK hein, banhira Ministériu Públiku delega fila-fali prosesu bá PSIK atu kontinua halo investigasaun téknika atu rekolla prova sira hotu, inklui rona deklarasaun husi suspeitu sira no kompleta elementu prova sira seluk.
Vicente afirma, remesa kazu ne'e ba Ministériu Públiku halo ona ho imediatu, enkuantu PSIK hein orientasaun tuir mai husi Autoridade judisiál atu kontinua prosesu investigasaun.
Molok ne’e, iha loron 28 Maiu 2026, PSIK ho ekipa Servisu Nasionál Intelijénsia (SNI) detein membru Igreja Katólika Karismatika Timor-Leste (ICCTL) na’in-rua ne’ebé deskonfia utiliza konta Facebook “Rinha Costa” hodi insulta no injúria bá Arsebispu Arkidiosese Metropolitana Díli, Dom Virgílio Kardeál do Carmo da Silva, SDB no Bispu Dioseze Baucau, Dom Leandro Mari Alves iha média sosial.
Informasaun ne’ebé hato'o husi fonte servisu sekreta, konfirma katak iha Kinta, 28 Maiu 2026, hale’u tuku 19:00 Otl, PSIK hamutuk ho SNI detein ona suspeitu ne’ebé utiliza konta Facebook “Rinha Costa” hodi halo injúria no insulta ba Kardeál no Bispu sira.
“PSIK ho SNI detein ona suspeitu ne’ebé utiliza konta Facebook “Rinha Costa” ne’ebé halo injúria (insulta ka tolok) Kardeál no bispu sira,” fontes PSIK ne’e hateten.
Iha Sesta (29/5), hale’u tuku 16:30 Otl, PCIC akompaña suspeitu na’in-rua husi ICCTL lori ba rezidénsia Dom Virgílio Kardeál do Carmo da Silva, SDB nian iha Lecidere ho objetivu atu husu perdaun diretamente bá lider relijiozu sira ne’ebé hetan ofensa.
